ଭୁବନେଶ୍ୱରରେ ଓଡ଼ିଆ ଉଇକିପିଡ଼ିଆର ୧୩ ତମ ଜନ୍ମତିଥି ପାଳନ, ୨୦୧୫ ଜୁନ ୩ ତାରିଖ

wikiତାରିଖ ଏବଂ ସମୟ: ୨୦୧୫ ଜୁନ ୩ ତାରିଖ, ସନ୍ଧ୍ୟା ୫ ଟା
ସ୍ଥାନ: ପଦାର୍ଥ ବିଜ୍ଞାନ ପ୍ରତିଷ୍ଠାନ, ସଚିବାଳୟ ମାର୍ଗ, ଭୁବନେଶ୍ୱର, ଓଡ଼ିଶା
କାର୍ଯ୍ୟକ୍ରମ ସବିଶେଷ: https://or.wikipedia.org/s/sml

ପ୍ରଥମ ଭାରତୀୟ କେତୋଟି ଉଇକିପିଡ଼ିଆ (Wikipedia) ମଧ୍ୟରୁ ଅନ୍ୟତମ ଓଡ଼ିଆ ଉଇକିପିଡ଼ିଆ ଏହି ମାସ ୩ ତାରିଖରେ ତାହାର ୧୩ ବର୍ଷ ବ୍ୟାପୀ ମୁକ୍ତ ଜ୍ଞାନ ବିତରଣର ମହୋତ୍ସବ ପାଳୁଛି । ଇଂରାଜୀ ଉଇକିପିଡ଼ିଆ ଆରମ୍ଭ ହେବାର ବର୍ଷେ ପରେ ୨୦୦୨ ମସିହାରେ ଆରମ୍ଭ ହୋଇଲା ଓଡ଼ିଆ ଉଇକିପିଡ଼ିଆ । ଇଉନିକୋଡ଼ରେ ଉପଲବ୍ଧ ଓଡ଼ିଆ ଉଇକିପିଡ଼ିଆ ଏ ଭିତରେ ଓଡ଼ିଆ ଭାଷାର ବିଶାଳତମ ଅନଲାଇନ ଜ୍ଞାନକୋଷ (ଏନସାଇକ୍ଲୋପିଡ଼ିଆ)ରେ ପରିଣତ ହୋଇଛି । ଭାରତର ବିଭିନ୍ନ ସ୍ଥାନରେ ରହୁଥିବା ପାଖାପାଖି ୧୭ ଜଣ ସକ୍ରିୟ ସମ୍ପାଦକ (“ଉଇକିଆଳି” ନାମରେ ପରିଚିତ)ଙ୍କ ଦେଇ ସମ୍ପାଦିତ ଓ ୮,୮୦୦ରୁ ଅଧିକ ପ୍ରସଙ୍ଗରେ ଭରା ଏହି ପ୍ରକଳ୍ପଟି ଏକ ଜ୍ଞାନକୋଷରୁ ଅନେକ ଉପରେ । ସ୍ୱେଚ୍ଛାରେ ସମ୍ପାଦନ କରୁଥିବା ସମ୍ପାଦକମାନଙ୍କ ଉଦ୍ୟମ ହେତୁ କପିରାଇଟ ଥିବା ଅନେକ ବହିର ଲାଇସେନ୍ସ କ୍ରିଏଟିଭ କମନ୍ସ ଭଳି ମୁକ୍ତ ଲାଇସେନ୍ସରେ ରୂପାନ୍ତରତିକ କରାଯାଇ ସେସବୁକୁ ଇଣ୍ଟରନେଟ ଜରିଆରେ ଅଧିକ ପାଠକଙ୍କ ନିକଟରେ ପହଞ୍ଚାଇବାର ବାଟ ତିଆରି ହୋଇଛି । ଏହା ଛଡ଼ା ଲେଖକ ଓ ସତ୍ୱାଧୀକାରୀ (କପିରାଇଟ ମାଲିକ)ଙ୍କ ସହ ସନ୍ଧି କରି ଅନେକ ଉପାଦେୟ ରଚନା ଇଣ୍ଟରନେଟରେ ଉପଲବ୍ଧ କରାଯାଉଛି । or.wikipedia.org ରେ ଉପଲବ୍ଧ ଓଡ଼ିଆ ଉଇକିପିଡ଼ିଆରେ ସଭିଙ୍କୁ ସମ୍ପାଦନା କରିବାର ସୁଯୋଗ ଦିଆଯାଇଥାଏ ଯାହା ଫଳରେ ଖବରକାଗଜ, ପତ୍ରିକାଆଦିରେ ଅନେକ ଉପାଦେୟ ବିଷୟରେ ପ୍ରକାଶିତ ଲେଖାମାନଙ୍କ ଆଧାରରେ ନୂଆ ପ୍ରସଙ୍ଗ ତିଆରି ଓ ପୁରୁଣା ପ୍ରସଙ୍ଗର ଉନ୍ନତୀକରଣ କରାଯାଇପାରିବ ।

ଉଇକିଆଳିମାନେ ଜଗତରେ ଜଣାଶୁଣା ଉଇକିପିଡ଼ିଆ ଏଜୁକେସନ ପ୍ରୋଗ୍ରାମ ଭଳି ବିଭିନ୍ନ ଶିକ୍ଷଣ କାର୍ଯ୍ୟକ୍ରମ ହାତକୁ ନେଇ ପାଖାପାଖି ୨,୦୦୦ରୁ ଅଧିକ ଲୋକଙ୍କୁ ଓଡ଼ିଆ ଉଇକିପିଡ଼ିଆରେ ବିଭିନ୍ନ ବିଷୟରେ ଲେଖିବା ବାବଦରେ ଶିଖାଇଛନ୍ତି । ଏହାର ୧୩ ତମ ଜନ୍ମତିଥି ପାଳନ ନିମନ୍ତେ ଉଇକିଆଳି ସମୂହ ଏକ ବିଭିନ୍ନ ସରକାରୀ ଜର୍ଣ୍ଣାଲ, ଖବରକାଗଜ, ପତ୍ରିକା ଆଦିରେ ଥିବା ଅଣ-ଇଉନିକୋଡ଼ ଲେଖାରୁ ଇଉନିକୋଡ଼ରେ ରୂପାନ୍ତର କରିବା ପାଇଁ କ୍ୟାରେକ୍ଟର ଏନକୋଡିଙ୍ଗ କନଭର୍ଟର ବିତରଣ କରିବା ଯୋଜନା କରୁଛି । ଏହା ଫଳରେ ସର୍ଚ ଇଞ୍ଜିନରେ ଉପଲବ୍ଧ ହୋଇନପାରୁଥିବା ଅନେକ ଉପାଦେୟ ଲେଖା ଡିଜିଟାଲ କଣ୍ଟେଣ୍ଟ ଭାବେ ଇଉନିକୋଡ଼ରେ ଉପଲବ୍ଧ ହୋଇ ଇଣ୍ଟରନେଟ ପାଠକମାନଙ୍କ ପଠନଯୋଗୀ ହୋଇପାରିବ ।

ଯୋଗାଯୋଗ:
odiawiki@gmail.com
ମୃତ୍ୟୁଞ୍ଜୟ କର, ଓଡ଼ିଆ ଉଇକିପିଡ଼ିଆ ପରିଚାଳକ (ଫୋନ: 9437112371)
ଶୈଳେଶ ପଟ୍ଟନାୟକ, ଓଡ଼ିଆ ଉଇକିପିଡ଼ିଆ ଉଇକିଆଳି (ଫୋନ: 7537097770)
ସୁଭାସିସ ପାଣିଗ୍ରାହୀ, ଓଡ଼ିଆ ଉଇକିପିଡ଼ିଆ ପରିଚାଳକ ଓ ପ୍ରୋଗ୍ରାମ ଅଫିସର, ଆକସେସ ଟୁ ନଲେଜ-ସେଣ୍ଟର ଫର ଇଣ୍ଟରନେଟ ଏଣ୍ଡ ସୋସାଇଟି (08050515339)
subhashish@cis-india.org

Share in top social networks!

ଓଡିଆ ଉଇକିପିଡ଼ିଆର କର୍ମଶାଳା ଅନୁଷ୍ଠିତ ହୋଇଯାଇଛି ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟ, ବୁର୍ଲାରେ

Odia-Wikipedia-workshop-Burla-2 ସମ୍ବଲପୁରର ବୁର୍ଲାଠାରେ ଥିବା ‘ବୀର ସୁରେନ୍ଦ୍ରସାଏ ବୈଷୟିକ ବିଶ୍ୱବିଦ୍ୟାଳୟ(ଭିସୁଟ)’ ର ଗୋଲ୍ଡ଼େନ ଜୁବୁଲୀ ସେମିନାର ହଲ ପରିସରରେ ଓଡ଼ିଆ ଉଇକିପିଡ଼ିଆ ସମ୍ବନ୍ଧରେ ଏକ କର୍ମଶାଳା ଅନୁଷ୍ଠିତ ହୋଇଯାଇଛି । ବିଶ୍ୱବିଦ୍ୟାଳୟର ୧୦୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀ ଏହି କର୍ମଶାଳାରେ ଭାଗ ନେଇ ଓଡ଼ିଆ ଉଇକିପିଡ଼ିଆ ବ୍ୟବହାର ସଂପର୍କରେ ଜ୍ଞାନ ଅର୍ଜନ କରିଥିଲେ । ବିଶ୍ୱବିଦ୍ୟାଳୟର ପୁରାତନ ଛାତ୍ର ତଥା ସକ୍ରିୟ ଓଡ଼ିଆ ଉଇକିଆଳି ଗୋର୍ବାଚୋଭ ପୋଥାଳଙ୍କ ତତ୍ୱାବଧାନରେ ଏହି କର୍ମଶାଳା ଆୟୋଜିତ ହୋଇଥିଲା ଏବଂ ଉପସ୍ଥିତ ସମସ୍ତଙ୍କୁ ଉଇକିପିଡ଼ିଆ ସଂପର୍କରେ ସବିଶେଷ ବିବରଣୀ ପ୍ରଦାନ କରାଯାଇଥିଲା । ସେ କହିଥିଲେ ଯେ, ଓଡ଼ିଆ ଉଇକିପିଡ଼ିଆ ଓଡ଼ିଆ ଭାଷାରେ ଇଣ୍ଟରନେଟ୍‌ରେ ଉପଲବ୍ଧ ଏକ ଖୋଲା ଜ୍ଞାନକୋଷ । ଏହାକୁ ବ୍ୟବହାର କରି ଜଣେ କିପରି ନିଜର ଗବେଷଣା ଦକ୍ଷତା ବିକାଶ ଓ ମାଗଣା ଜ୍ଞାନର ବିତରଣ କରିପାରିବ, ସେହି ବିଷୟରେ ଆଲୋଚନା କରିଥିଲେ । ଏହା ବ୍ୟତୀତ ଓଡ଼ିଆ ଉଇକିପିଡ଼ିଆର ଇତିହାସ, ଆଭିମୁଖ୍ୟ, ଉଇକିପିଡ଼ିଆରେ ବର୍ତ୍ତମାନ ଚାଲୁଥିବା ବିଭିନ୍ନ ପ୍ରକଳ୍ପ ବିଷୟରେ ସବିଶେଷ ଆଲୋଚନା କରିଥିଲେ ଓ କହିଥିଲେ ଓଡ଼ିଆରୁ ଦୂରେଇ ଯାଉଥିବା ଲୋକଙ୍କୁ ଓଡ଼ିଆମୁଖୀ କରାଇବାର ଏହା ଅନ୍ୟତମ ପ୍ରଚେଷ୍ଟା । ଶ୍ରୀ ପୋଥାଳ ନିଜର ବକ୍ତବ୍ୟ ଦେଇ ସାରିବା ପରେ ଉଇକିପିଡ଼ିଆ ସମ୍ବନ୍ଧରେ ଛାତ୍ରଛାତ୍ରୀଙ୍କର ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ । ଏହା ପରେ କର୍ମଶାଳରେ ସେ ଉଇକିପିଡିଆରେ ନୂତନ ପ୍ରସଙ୍ଗ ଲେଖିବା, ସମ୍ପାଦନା କରିବା, ଆଧାର ଦେବା ଇତ୍ୟାଦିର ପ୍ରଶିକ୍ଷଣ ଦେଇ ଏକ ଗଣ-ସମ୍ପାଦନା ଆୟୋଜନ କରିଥିଲେ । କର୍ମଶାଳାରେ ବିଶ୍ୱବିଦ୍ୟାଳୟର ପ୍ରାଧ୍ୟାପକ ଡ. ଅମରନାଥ ନାୟକ, ଡ଼ ବିଭୂତି ଭୂଷଣ ପାଣି, ଡ଼. ଅକ୍ଷୟ କୁମାର ପଟ୍ଟନାୟକ, ଡ. ଜ୍ୟୋତି ରଞ୍ଜନ ମହାନ୍ତି ପ୍ରମୁଖ ଉପସ୍ଥିତ ଥିଲେ । କର୍ମଶାଳାର ସଫଳ ପରିଚାଳନା ପାଇଁ ଛାତ୍ର ପ୍ରତିନିଧି ଅବିନାଶ କୁମାର ପୁହାଣ, ସୁପ୍ରଜ୍ଞାନ ପଟ୍ଟନାୟକ, ସୁଭମ ସାହୁ, ସୋମ୍ୟଶ୍ରୀ ଋତୁପର୍ଣ୍ଣୋ ସାହୁ, ଅନନ୍ୟା ସୃଷ୍ଟି ଶତପଥୀ ସାହାଯ୍ୟ କରିଥିଲେ ।

Share in top social networks!

ଓଡ଼ିଆ ଉଇକିପିଡ଼ିଆର ନ‌ବମ ଜନ୍ମତିଥି ଅବସରରେ କର୍ମଶାଳା: ଇମିଡ଼ିଆରେ ଓଡ଼ିଆ ଭାଷାର ପ୍ର‌ୟୋଗ

Odia Wikipedia 9th Anniversary-3ଓଡ଼ିଆ ଉଇକିପିଡ଼ିଆ (http://or.wikipedia.org) ଓଡ଼ିଆ ଭାଷାରେ ଇଣ୍ଟରନେଟରେ ଉପଲବ୍ଧ ଏକ ଖୋଲା ଜ୍ଞାନକୋଷ । ଏହାର ନ‌ବମ ଜନ୍ମତିଥି ଅବସରରେ ଏକାଡେମି ଫର ମିଡ଼ିଆ ଲର୍ଣିଂ (ଏଏମ୍ଏଲ୍) ପରିସରରେ ସେଣ୍ଟର ଫର ଇଣ୍ଟରନେଟ ଆଣ୍ଡ ସୋସାଇଟି ଆନୁକୁଲ୍ୟରେ ଏକ କର୍ମଶାଳାର ଆୟୋଜନ ହୋଇ‌ଯାଇଛି । କର୍ମଶାଳାର ଆଲୋଚ୍ୟ ବିଷୟ ଥିଲା- “ଇ-ମିଡ଼ିଆରେ ଓଡ଼ିଆ ଭାଷାର ପ୍ରୟୋଗ” ।

ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଶା ଭାଷା ପ୍ରତିଷ୍ଠାନର ନିର୍ଦ୍ଦେଶକ ପ୍ରସନ୍ନ କୁମାର ମହାନ୍ତି ବକ୍ତବ୍ୟ ଦେଇଥିଲେ ଯେ, “ପ୍ରଥମେ ଭାଷାର ଶୁଦ୍ଧ ରୂପ, ସ୍ଥିର ଚିତ୍ର, ତା’ପରେ ତାହାକୁ ମିଡ଼ିଆ ମାଧ୍ୟମରେ ସାଧାରଣରେ ପ‌ହଞ୍ଚାଇବାର ପ୍ର୍‌ୟାସ କରିବାକୁ ପଡ଼ିବ । ଏଥିସ‌ହିତ ଚିରାଚରିତ ଢଙ୍ଗରେ ପ୍ରଚଳିତ ହୋଇଆସୁଥିବା ଭୁଲଧାରଣାକୁ ସଂଶୋଧନ କରିବାର ପ୍ର‌ୟାସ କରାଯାଉନାହିଁ । ଯେ କେହି ବି ଏ କ୍ଷେତ୍ରରେ ପ୍ରୟାସ କରି କିଛି ନୂତନ ଦିଗର ଉନ୍ମୋଚନ କରୁଥିଲେ ମଧ୍ୟ ତାହାକୁ ଗ୍ରହଣ କରାଯାଉନାହିଁ । ସରକାରୀ ସ୍ତରରେ ଏବଂ ଉଚ୍ଚଶିକ୍ଷିତମାନଙ୍କ ଦ୍ୱାରା ହେଉଥିବା ଭୁଲ ଯୋଗୁଁ ଓଡ଼ିଆ ଭାଷାର ପ୍ରକୃତ ରୂପ ପ‌ହଞ୍ଚିପାରୁନା‌ହିଁ । ଏହି ହୀନମନ୍ୟତାକୁ ଦୂରକରାଯାଇପାରିଲେ ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତା ମିଳିପାରିବାର ବାଟ ସୁଗମ ହେବ ବୋଲି ସେ ଆଶା ବ୍ୟକ୍ତ କରିଥିଲେ । ସରକାରୀ ସ୍ତରରେ ଓଡ଼ିଆ ଭାଷାର ବିକାଶ ପାଇଁ ଆର୍ଥିକ ସ୍ୱଚ୍ଛଳତା ଥିଲେ ବି ଉପ‌ଯୁକ୍ତ ପ୍ରସ୍ତାବର ଅଭାବ ରହିଛି । ବିଦ୍ଧିବଦ୍ଧ ପ୍ରସ୍ତାବ ଆସିଲେ ସରକାର ଏହାକୁ ସୁଚାରୁ ରୂପେ ସମ୍ପାଦନ କରିବେ ।”

ବିଶିଷ୍ଠ ଓଡ଼ିଆ ଭାଷାବିଦ ପ୍ରଫୁଲ୍ଲ ତ୍ରିପାଠୀ, ଓଡ଼ିଆ ଭାଷା ଆନ୍ତର୍ଜାତୀୟ ସ୍ତରରେ ୩୧ ତମ ସ୍ଥାନରେ ଥିଲେ ବି ଏହାକୁ ଶାସ୍ତ୍ରୀୟ ମାନ୍ୟତା ମିଳିନ‌ଥିବାରୁ କ୍ଷୋଭପ୍ରକାଶ କରିଥିଲେ । ଏହା ପଛରେ ଚାରିକୋଟି ଓଡ଼ିଆଙ୍କର ସ୍ୱାର୍ଥ ନିହିତ ରହିଛି । ଆମର ବ୍ୟକ୍ତିଗତ ଚରିତ୍ର, ସାମାଜିକ ଚାଲିଚଳଣିରେ ବ୍ୟବ‌ହୃତ କ‌ଥିତ ଭାଷାର ସଠିକ ଲିଖିତ ପ୍ରକାଶ ହୋଇପାରୁନାହିଁ । ବିଭିନ୍ନ ବୁଦ୍ଧିଜୀବୀ ମହଲରେ ଓଡ଼ିଆ ଭାଷାର ସ୍ୱରୂପକୁ ନେଇ ଉପୁଜିଥିବା ଦ୍ୱନ୍ଦ ଓଡ଼ିଆ ଭାଷାକୁ ବିଶ୍ୱବିଦିତ କରିବାରେ ପ୍ରତିବନ୍ଧକ ସାଜିଛି । ଲିପି-ବ୍ୟାକରଣର ପ୍ରକୃତ ଉପଯୋଗୀତାକୁ ହୃଦୟଙ୍ଗମ କରି ତାହାକୁ ବ୍ୟବ‌ହାର କଲେ ଓଡ଼ିଆ ଭାଷା ସର୍ବାଦୃତ ହୋଇ ପାରିବ । ଏଥିସ‌ହିତ ଆଲୋକର ଗତି ସଙ୍ଗେ ଧ୍ୱନିର ଗତିକୁ ତୀବ୍ର କରିବାକୁ ପଡ଼ିବ । ସାଧରଣ ଲୋକଙ୍କ ବ୍ୟବ‌ହାରରେ ସୁବିଧା ପାଇଁ ଫୋନେଟିକ ବା ଉଚ୍ଚାରଣଭିତ୍ତିକ ଟାଇପିଂ ପଦ୍ଧତି, ଇନସ୍କ୍ରିପ୍ଟ ଟାଇପିଂ ପଦ୍ଧତି, ଯୁନିଭର୍ସାଲ ଇଣ୍ଟରନେଟ ଯୋଗାଯୋଗ, ଇଣ୍ଟରାକ୍ଟିଭ ଓଡ଼ିଆ ଲର୍ଣିଂ, ଗ୍ରାମାଞ୍ଚଳରେ ଶିକ୍ଷାର ପ୍ରସାର, ଉନ୍ନ‌ତ ଶିକ୍ଷାଦାନର ପ୍ରଣାଳୀ ଆଦି ଉପରେ ଆଲୋକପାତ କରିଥିଲେ ।

ଭାଷାର ବ୍ୟବ‌ହାରିକ ଜ୍ଞାନ କେବଳ ଶିକ୍ଷାଜୀବୀମାନଙ୍କ ମଧ୍ୟରେ ସୀମିତ ନରହି ତୃଣମୂଳ ସ୍ତରରେ ପହଞ୍ଚିବା ନିହାତି ଆବଶ୍ୟକ ରହିଛି । ଭାଷା ଉପରେ କାହାରି ବ୍ୟକ୍ତିଗତ ଅଧୀକାର ନାହିଁ । କିନ୍ତୁ ଏହି ଭାଷା ଧନୀ, ମାନୀ, ଶିକ୍ଷିତ ଅଶିକ୍ଷିତ ସଭିଙ୍କୁ ଏକ‌ତ୍ର କରିବାରେ ମୁଖ୍ୟ ଭୂମିକା ଗ୍ରହଣ କରିଥାଏ । ତେଣୁ ଏହି ଭାଷାର ସୁରକ୍ଷା କୌଣସି ବ୍ୟକ୍ତି ମଧ୍ୟରେ ସୀମିତ ନରହି ପ୍ରତିଟି ମଣିଷର କର୍ତ୍ତବ୍ୟ ହେବା ଉଚିତ । ବର୍ତ୍ତମାନ ଜଗତୀକରଣ ସମୟରେ ଇଣ୍ଟରନେଟର ଯୋଗାଯୋଗର କ୍ଷୀପ୍ର ଓ ସ‌ହଜ ମାଧ୍ୟମ ପାଲଟିଛି । କଳା, ସାହିତ୍ୟ ଓ ବିଜ୍ଞାନ ଇଣ୍ଟରନେଟ ଯୋଗେ ସମସ୍ତଙ୍କ ଭିତରେ ସଚେତନ‌ତା ସୃଷ୍ଟି କରିପାରିଛି । ଏସବୁ ଇଂରାଜୀ ଭାଷାରେ ପ୍ରସାରିତ ହେଉଥିବା ବେଳେ ଆମ ମାତୃଭାଷା ଓଡ଼ିଆ ପଛରେ ରହିଯାଇଛି । ଓଡ଼ିଆ ଭାଷାକୁ ଇଣ୍ଟରନେଟ ମାଧ୍ୟମରେ ସାରା ଜଗତରେ ପ‌ହ‌ଞ୍ଚାଇବାର ପ୍ରୟାସ ଉଇକିପିଡ଼ିଆ ମାଧ୍ୟମରେ ସଚେତିତ ଓଡ଼ିଆମାନେ ଚେଷ୍ଟା କରିଛନ୍ତି । କାଗଜର ବ‌ହୁଳତା କମିବା ସଙ୍ଗେସଙ୍ଗେ ଅନଲାଇନରେ ଚାହିଦା ବଢ଼ିବାରେ ଲାଗିଛି । ଆଗାମୀ ଭବିଷ୍ୟତ ପାଇଁ ଅନଲାଇନ ହିଁ ସୂଚନା ପ୍ରସାରଣର ଏକମାତ୍ର ମାଧ୍ୟମ ।

ଏଥିରେ ଭାଗନେଇ ଶିକ୍ଷାବିଦ ପ୍ରଫେସର ଧନ‌ଦାକାନ୍ତ ମିଶ୍ର କମ୍ପ୍ୟୁଟର କ୍ଷେତ୍ରରେ ମାଗଣା ଲିନ‌କ୍ସ (Linux)ର ଉପ‌ଯୋଗୀତା ଉପରେ ଗୁରୁତ୍ୱାରୋପ କରିଥିଲେ । ଏଥିସ‌ହିତ ଓଡ଼ିଆମାନଙ୍କ ଭିତରେ ଥିବା ଇଚ୍ଛା ଓ ଆବେଗକୁ ଅନଲାଇନ ମାଧ୍ୟମରେ ପ୍ରବାସୀ ଭାରତୀୟଙ୍କ ନିକଟରେ ପ‌ହ‌ଞ୍ଚାଇବାର ଓଡ଼ିଆ ଉଇକିପିଡ଼ିଆର ପ୍ରୟାସକୁ ସାଧୁବାଦ ଜଣାଇଥିଲେ । ଭବିଷ୍ୟତରେ ସେ ଉଇକିପିଡ଼ିଆ ପାଇଁ ସହଯୋଗର ହାତ ନିଶ୍ଚିତ ବଢ଼ାଇବେ ବୋଲି ପ୍ରତିଶ୍ରୁତି ଦେଇଥିଲେ ।

Share in top social networks!