ଶିଶୁଚର୍ଯ୍ୟା…!!!

1621865_496898993752639_1286558790_nଶୈଶବର ସ୍ମୃତି ସମସ୍ତଙ୍କ ପାଇଁ ଅପାଶୋରା; ଘାଣ୍ଟିଦିଏ କେବେକେବେ ସେଦିନ ସବୁ ଏଦିନ ଗୁଡ଼ାକରେ । ସଭିଏଁ ଫେରିଯିବାକୁ ଚାହାଁନ୍ତି ସେଇ ଅଙ୍କଗ ପରଶ ପାଇଁ । ଶିଶୁତ୍ୱ ବୋଧକୁ ସଦା ତଉଲିବାକୁ ପଡ଼ିଥାଏ ଆଜିକାର ଏଇ ସଂଘର୍ଷମୟ ଜୀବନଯାତ୍ରାରେ। ନିଜର ଚେତନାବୋଧ ଆସିବା ଆଗରୁ ଏଇ ଶିଶୁତ୍ୱ ଚାଲି ଯାଇଥାଏ । ଆଜି ମୁଁ ଆପଣଙ୍କୁ ଚାଲନ୍ତୁ ବୁଲେଇ ନେବି ଆଉଥରେ ସେଇଦିନ ସବୁ ନିକଟକୁ ମୋ ଅନୁଭୂତିର ଚଲାବାଟରେ । ନିଜର ଶିଶୁତ୍ୱକୁ ଅନ୍ୟ ଭିତରେ ଦେଖି ଆମୋଦିତ ହେବାରେ ଅକଳ୍ପନୀୟ ଆନନ୍ଦ ଭରି ରହିଛି ଯେପରିକି ନିଜର ଶିଶୁକୁ ପେଟ ପୁରାଇ ଖାଇବାର ଦେଖିଲେ, ମମତାମୟୀ ମା’ର ପେଟ ପୁରିଯାଏ ଅଥବା ନିଜର ପୁଅଝିଅର ସଫଳତାରେ ବାପାର ଛାତି ଫୁଲି ଉଠେ ।

ଯେତେବେଳେ ଗୋଟିଏ ସ୍ତନନ୍ଧୟ, ଅଙ୍କଗ ଅଥବା ଅବଗଣ୍ଡ ଶିଂଶିକୁ ଦେଖେ; କୁତୁହଳୀ ମନଟା ମୋତେ ସେମାନଙ୍କ ଚପଳାମୀପଣକୁ ଅନୁଧ୍ୟାନ କରିବାକୁ ତୁହାଇ ତୁହାଇ କୁହେ। ମୁଁ ସେଇଠି ମୋର ବୟସର ଗଣିତ ସମୀକରଣ ପକାଇ ପ୍ରଥମ ବୟଃରୁ କୌମାର୍ଯ୍ୟ ଦେଇ ବୟଃସନ୍ଧି ଯାଏଁ ପହଞ୍ଚିଯାଏ । କୁତୁକୁତୁ ହୋଇଯାଏ ମୋ ପ୍ରୌଢ଼ତ୍ୱ ଭିତରେ ଉଙ୍କି ମାରୁଥିବା ସେଇ ବାଲ୍ୟକାଳଟା । ଏମିତି ହୋଇଥିଲେ ମୁଁ ସେମିତି କରିଥାନ୍ତି ଆଉ ମୋ ବୋଉ ଏମିତି କହିଥାନ୍ତା ଆଉ ମୋ ବାପା ସେମିତି କହିଥାନ୍ତେ; ଏଇୟା ସବୁ ଆକଳନ କରେ। ସମସ୍ତଙ୍କ ଭିତରେ ଏଇ ଅନୁଭବ, ଅନୁଭୂତି ଆଉଟୁପାଉଟୁ ହେଉଥିବ। ଏଇ ଶିଶୁତ୍ୱକୁ ଉତ୍ତମ ଯତ୍ନଦେଇ ସେମାନଙ୍କୁ ଆଗାମୀକାଲି ପାଇଁ ପ୍ରସ୍ତୁତ କରିବାଟା ହିଁ ପ୍ରତ୍ୟେକ ପିତାମାତାଙ୍କର ଧର୍ମ ହେବା ବିଧେୟ।ଏଇ ଶିଶୁଟିକୁ କଞ୍ଚାମାଟି କୁହନ୍ତୁ ବା ଅତି ସୁକୋମଳ ଫୁଲଗଛଟିଏ କୁହନ୍ତୁ; ବିନା ପ୍ରଯତ୍ନରେ ସେମାନେ ଯେ ଅବାଟରେ କେତେବେଳେ ନିଜର ଚରିତ୍ର, ଜ୍ଞାନ ଓ ଆଉ ବିକାଶକୁ ଟେକି ଦେବେ ତାର କିଛି ଇୟତ୍ତା ନଥିବ।

ସେଦିନ ଗୋଟିଏ ଶିଶୁ ପ୍ରଯତ୍ନ କେନ୍ଦ୍ରକୁ ଯାଇଥାଏ । ଓହୋ…କି ବିଚିତ୍ର ସେ ଦୃଶ୍ୟ । ସାରା ଦୁନିଆର ଈଶ୍ୱର ସବୁ ସେଇଠେ ଯେପରି ମେଳା ମଉଛବ କରୁଛନ୍ତି। ମନ ପୁରିଗଲା, ପେଟ ଥଣ୍ଡା ହୋଇଗଲା। ଭାବିଲି, ଆଜିଯାଏଁ କଣ କରୁଥିଲି ମୁଁ ! କେମିତି ଝୁକିଗଲି ଏସବୁ ଦେଖିବାରୁ ।

(କ୍ରମଶଃ)

[ “ମୋ ପିଲାଦିନ” ସଙ୍କଳନରୁ କିୟଦଂଶ ]

Share in top social networks!

ସୁଖ….ଶାନ୍ତି….ସନ୍ତୋଷ…ଏକ ପ୍ରଶ୍ନବାଚୀ

ବବି ଅନସୂୟା

ସତରେ….ସୁଖ କେଉଁଠି ଥାଏ ?
ପ୍ରାପ୍ତିରେ ନା ମୁକ୍ତିରେ…
ଅପମାନରେ ନା ଅଭିମାନରେ
ଭଲପାଇବାରେ ନା ଘୃଣା କରିବାରେ
ଇର୍ଷ୍ୟ।ରେ ନା ଜ୍ବଳନରେ …
ଜାଣେନା…ସୁଖ କେଉଁଠି ଥାଏ ?

ଜାଣ କି ତୁମେ ଶାନ୍ତି କେଉଁଠି ଥାଏ ?
ଜିତିବାରେ କି ହାରିବାରେ…
ପଳାତକ ସାଜିବାରେ ସଂଗ୍ରାମ କରିବାରେ
କଷ୍ଟ ଦେବାରେ କି ସହିବାରେ
ଉନ୍ନତିରେ ଅବା ଅବନ୍ନତିରେ….
କହିପାରିବ…ଶାନ୍ତି କେଉଁଠି ଥାଏ ?

ପଚାରିପାରେ କି ସନ୍ତୋଷ କେଉଁଠି ଥାଏ ?
ସବୁକିଛି ପାଇ ହରେଇଦେବାରେ
ନା ସବୁ ହରେଇ ନିଃସ୍ବ ପାଲଟିଯିବାରେ
ନିଃସଂଗତାରେ ନା ଲୋକାରଣ୍ୟରେ
ପ୍ରାସାଦରେ ନା କୁଟୀରରେ
ସତରେ…..ସନ୍ତୋଷ କେଉଁଠି ଥାଏ ?

Share in top social networks!