ନଗଡାକୁ ଏକକ ଘଟଣା ଭାବେ ବିବେଚନା କରିବା ଧର୍ମକୁ ଆଖି ଠାର: ବିଜେପି

13726561_1733889733494703_2820078073850156081_nଖଣି ଓ ଶିଳ୍ପ ସମୃଦ୍ଧ ଯାଜପୁର ଜିଲ୍ଲାର ସୁକିନ୍ଦା ନିର୍ବାଚନମଣ୍ଡଳୀ ଅନ୍ତର୍ଗତ ନଗଡା ଗ୍ରାମ ଶିଶୁମଡକର ଖବର ପ୍ରକାଶ ପାଇବା ପରେ ସରକାର ଏହାକୁ ଏକ ଏକକ ଘଟଣା ଭାବେ ବର୍ଣନା କରିବା ସହିତ ଏହି ଅଂଚଳକୁ ସବୁ ସାହାଯ୍ୟ ସୁବିଧା ପହାଂଚାଇବାର କଥା କହି ସାମୟିକ ଭାବେ ସମସ୍ୟାକୁ ଚାପି ଦେବାର ଚେଷ୍ଟା କରୁଛନ୍ତି ବୋଲି ବିଜେପି ମୁଖପାତ୍ର ଗୋଲକ ମହାପାତ୍ର ଅଭିଯୋଗ କରିଛନ୍ତି।
ଗର୍ଭବତୀ ମହିଳା ଓ ଶିଶୁ ମାନଙ୍କର ଯତ୍ନ ସେମାନଙ୍କ ପାଇଁ ଉଦ୍ଦିଷ୍ଟ ଯୋଜନାଗୁଡିକ ରାଜ୍ୟ ସରକାରଙ୍କ ସ୍ଥାଣୁତା ଓ ଅପାରଗତା କାରଣରୁ କାର୍ଯ୍ୟକାରୀ ହୋଇ ପାରି ନାହିଁ। ରାଜ୍ୟର ଏକ ତୃତୀୟାଂଶ ଶିଶୁ ଅପପୃଷ୍ଟିର ଶୀକାର ହୋଇଥିବା ସରକାରୀ ରିପୋର୍ଟ ସ୍ପଷ୍ଟ କରୁଛି। ଗଣମାଧ୍ୟମରେ ନଗଡା ଘଟଣା ପ୍ରସାରିତ ହେବା ପରେ ଏପରିକି ଖୋଦ ସ୍ୱାସ୍ଥ୍ୟ ମନ୍ତ୍ରୀ ଅତନୁ ସବ୍ୟସାଚୀଙ୍କ ମହାକାଳପଡା ନିର୍ବାଚନମଣ୍ଡଳୀ, ଶିଳ୍ପ ଓ ଖଣିରେ ସମୃଦ୍ଧ କେନ୍ଦୁଝର ଜିଲ୍ଲାରୁ ସରଜମିନ ରିପୋର୍ଟ ଆଧାରରେ ଅନେକ ଅପପୃଷ୍ଟି ଉଦାହରଣ ଲୋକ ଲୋଚନକୁ ଆଣିଲେଣି। ତେଣୁ ନଗଡା ଏକକ ଘଟଣା ନୁହେଁ। ରାଜ୍ୟରେ ଏହିଭଳି ପରିସ୍ଥିତି ବହୁ ସ୍ଥାନରେ ଦେଖାଦେଇଛି ବୋଲି ଶ୍ରୀ ମହାପାତ୍ର ଅଭିଯୋଗ କରିଛନ୍ତି।
ସେହିପରି ସଂପ୍ରତି ରାଜ୍ୟର ବିଭିନ୍ନ ମନ୍ତ୍ରୀ ମାନଙ୍କର ବିଭାଗ ସମୀକ୍ଷା ସମୟରେ ଖୋଦ ମୁଖ୍ୟମନ୍ତ୍ରୀ ମହିଳା ଓ ଶିଶୁ ବିକାଶ ବିଭାଗର କାର୍ଯ୍ୟକୁ ଉଚ୍ଚ ପ୍ରଶଂସା କରିଥିଲେ। ତାର ଗୋଟିଏ ମାସ ନ ପୁରୁଣୁ ରାଜ୍ୟରେ ଅପପୃଷ୍ଟିରୁ ଶିଶୁ ମୃତ୍ୟୁର ଗୋଟିଏ ଗାଁ ପରେ ଆଉ ଗୋଟିଏ ଗାଁର ଘଟଣା ମୁଖ୍ୟମନ୍ତ୍ରୀଙ୍କ ସମୀକ୍ଷା ପରସ୍ପର ଟେକାଟେକି ନ୍ୟାୟରେ ସାଧାରଣ ଗରୀବ ମହିଳା ଓ ଶିଶୁଙ୍କ ସ୍ୱାର୍ଥକୁ ଜଳାଂଜଳି ଦିଆ ଯାଇଥିବା ଶ୍ରୀ ମହାପାତ୍ର ଅଭିଯୋଗ କରିଛନ୍ତି।
ଆଙ୍ଗନବାଡି ଘର ନିର୍ମାଣ ପାଇଁ ଉଦ୍ଦିଷ୍ଟ ଅର୍ଥ ତଥା ସପ୍ଲିମେଂଟାରୀ ନ୍ୟୁଟ୍ରେସନ ପ୍ରୋଗ୍ରାମ (ଏସଏନପି) ବାବଦରେ ଜିଲ୍ଲା ମାନଙ୍କ ପାଇଁ ଉଦ୍ଦିଷ୍ଟ ଅର୍ଥକୁ ଜିଲ୍ଲାପାଳମାନେ ବିନିଯୋଗ ନକରି ପାରିବା କାରଣରୁ ସରକାରଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି ହେଉଛି, ତେଣୁ ଶୀଘ୍ର ଅର୍ଥ ଉଠାଇ ନେବା ପାଇଁ ମହିଳା ଓ ଶିଶୁ ବିକାଶ ବିଭାଗ ଶାସନ ସଚିବ ଚଳିତ ମାସରେ ଜିଲ୍ଲାପାଳଙ୍କୁ ଚିଠି ଲେଖି ଲେଖିଛନ୍ତି। ଏପରିକି ସମ୍ବଲପୁର, ନୁଆପଡା, ମାଲକାନଗିରି, କନ୍ଧମାଳ, ଦେଓଗଡ, ବୌ÷÷ଦ ଓ ଭଦ୍ରକ ଜିଲ୍ଲା ପାଇଁ ଉଦ୍ଦିଷ୍ଟ ଏସଏନପି ଅର୍ଥ ୩୮.୪ କୋଟି ଟଙ୍କାରୁ ଟଙ୍କାଟିଏ ମଧ୍ୟ ନ ନେଇଥିବାରୁ ଜିଲ୍ଲାପାଳ ମାନଙ୍କୁ ଚିଠି ଲେଖି ତାଗିଦ କରାଯାଇଛି।
ଏହା ସ୍ପଷ୍ଟ କରୁଛି ନବୀନ ପଟ୍ଟନାୟକଙ୍କ ସରକାର ଅମଳରେ ଗରୀବ ଓଡିଆ ଗର୍ଭବତୀ ମହିଳା ଓ ଶିଶୁ ମାନେ ସେମାନଙ୍କର ନ୍ୟାଯ୍ୟ ଅଧିକାରରୁ ବଂଚିତ ହେଉଛନ୍ତି। ଅଙ୍ଗନବାଡି କେନ୍ଦ୍ର ଓ ଗର୍ଭବତୀ ମହିଳା ଓ ଶିଶୁ ମାନଙ୍କ ପାଇଁ ଗରମ ରନ୍ଧା ଖାଦ୍ୟ, ଟେକ ହୋମ ରାସନ ପାଇଁ ପର୍ଯ୍ୟାପ୍ତ ଅର୍ଥ ଥିବା ବେଳେ ଏହା ବ୍ୟବହାର ନ ହୋଇ ପଡି ରହିଛି।
ସେହିପରି ବିଧାନସଭାରେ ପ୍ରଶ୍ନର ଉତର ଦେଇ ମହିଳା ଶିଶୁ ବିକାଶ ମନ୍ତ୍ରୀ ଉଷା ଦେବୀ କହିଛନ୍ତି ଯେ ରାଜ୍ୟରେ ମୋଟ ୪୫, ୫୩୬ ଅତିଶୟ ପୁଷ୍ଟିହୀନ ଶିଶୁ ଅଛନ୍ତି। ଯାଜପୁର ଜିଲ୍ଲାରେ ୮୯୪, କଳାହାଣ୍ଡିରେ ୪୧୪୫, କେନ୍ଦୁଝରରେ ୩୨୮୭, କୋରାପୁଟରେ ୪୮୪୮, ମାଲକାନଗିରିରେ ୨୧୦୪, ମୟୁରଭଂଜରେ ୩୩୪୧, ନୂଆପଡାରେ ୨୫୫୩, ନବରଙ୍ଗପୁରରେ ୩୭୭୩, କନ୍ଧମାଳରେ ୧୫୨୮, ରାୟଗଡାରେ ୩୧୧୬, ସୁନ୍ଦରଗଡରେ ୩୫୫୧ ଅତିଶୟ ପୃଷ୍ଟିହୀନ ଶିଶୁ ଥିବା ରାଜ୍ୟ ସରକାର ବିଧାନସଭାରେ ଲିଖିତ ବିବୃତି ଦେଇଛନ୍ତି। ସମସ୍ତ ଖବର ଥିବା ସତ୍ୱେ ରାଜ୍ୟ ସରକାର ଜାଣି ଶୁଣି ଅବହେଳା କରିଛନ୍ତି ଏବଂ ଏହା ସକାଶେ ରାଜ୍ୟ ସରକାରଙ୍କ ପାଇଁ “ସ୍ଥାଣୁ, ଅପାରଗ, ଅବିଶ୍ୱସନୀୟ , ଗରୀବ ଓ ସାଧାରଣ ଲୋକଙ୍କ ବିରୋଧୀ” ଛଡା କଣ ଶବ୍ଦ ବ୍ୟବହାର କରାଯାଇ ପାରିବ ବୋଲି ଶ୍ରୀ ମହାପାତ୍ର ପ୍ରଶ୍ନ କରିଛନ୍ତି।
ଶ୍ରୀ ମହାପାତ୍ର ଅଭିଯୋଗ କରି ଆହୁରି କହିଛନ୍ତିଯେ, ୨୦୧୬-୧୭ ଆର୍ଥିକ ବର୍ଷରେ ଅଙ୍ଗନବାଡି ଘର ନିର୍ମାଣ ପାଇଁ ରାଜ୍ୟର ୨୨ଟି ଜିଲ୍ଲାକୁ ଦିଆଯାଇଥିବା ଅର୍ଥରୁ ଏଯାବତ ଟଙ୍କାଟିଏ ହେଲେ ଖର୍ଚ୍ଚ ହୋଇନାହିଁ। ସେହିପରି ଚଳିତ ବର୍ଷ ସପ୍ଲିମେଂଟାରୀ ନ୍ୟୁଟ୍ରେସନ ପ୍ରୋଗ୍ରାମ (ଏସଏନପି) ଦ୍ୱାରା ୧୯ଟି ଜିଲ୍ଲାକୁ ଦିଆଯାଇଥିବା ୨୦୨.୪୯ କୋଟି ଟଙ୍କା ମଧ୍ୟରୁ ଅଦ୍ୟାବଧି ମାତ୍ର ୮.୩୩କୋଟି ଖର୍ଚ୍ଚ ହୋଇଛି। ସିଏଜି ରିପୋର୍ଟ ଅନୁଯାୟୀ ୨୦୧୪-୧୫ ଆର୍ଥିକ ବର୍ଷରେ ରାଜ୍ୟରେ ଅଙ୍ଗନବାଡି ଘର ନିର୍ମାଣ ପାଇଁ ଆସିଥିବା ୧୦୦ କୋଟି ଟଙ୍କା ଖର୍ଚ୍ଚ ହୋଇ ନପାରି ଫେରିଯାଇଛି। ଏହା ରାଜ୍ୟ ସରକାରଙ୍କ ଅପାରଗତା ଓ ସ୍ଥାଣୁତା ପାଇଁ ସମ୍ଭବ ହୋଇଛି ବୋଲି ଶ୍ରୀ ମହାପାତ୍ର ତାତ୍ସଲ୍ୟ କରି କହିଛନ୍ତି।

Share in top social networks!

ନବୀନ ସରକାରଙ୍କର ୧୬ ବର୍ଷର ସ୍ଥାଣୁତା ଓ ଅପାରଗତାର ପ୍ରତୀକ ହେଉଛି ଯାଜପୁରର ଶିଶୁ ମଡକ ଭୋଗୁଥିବା ନଗଡା ଗ୍ରାମ : ବିଜେପି ପ୍ରତିନିଧି ଦଳ

bjppଯାଜପୁର ଜିଲ୍ଲା ନଗଡା ଓ ଏହାର ଆଖପାଖ ଗ୍ରାମ ବୁଲି ଦେଖିବା ପରେ ଏହି ଗ୍ରାମରେ ବସବାସ କରୁଥିବା ଲୋକଙ୍କ ଦୟନୀୟ ସ୍ଥିତି ନବୀନ ପଟ୍ଟନାୟକଙ୍କ ସରକାରର ସ୍ଥାଣୁତା ଓ ଅପାରଗତାର ଆଉ ଏକ ନମୂନା ବୋଲି ଭୁବନେଶ୍ୱର ଫେରି ବିଜେପିର ପ୍ରତିନିଧି ଦଳ ଗଣମାଧ୍ୟମକୁ ସୂଚନା ଦେଇ କହିଛନ୍ତି। ସମସ୍ତଙ୍କ ମୁଣ୍ଡ ଉପରେ ପକ୍କା ଘର, ଘରେ ପାନୀୟ ଜଳ, ୨୪ ଘଂଟିଆ ବିଜୁଳି, ଘରେ ପାଇଖାନା, ପିଲାଙ୍କ ପାଇଁ ଶିକ୍ଷା, ସ୍ୱାସ୍ଥ୍ୟ ସେବାର ସୁବିଧା, ସଡକ ଯୋଗାଯୋଗର ବ୍ୟବସ୍ଥା ଓ ଜୀବନ ଜୀବିକା ପାଇଁ ରୋଜଗାରର ସୁଯୋଗ ଯଦି ସରକାରର ସଫଳତା ଓ ବିଫଳତାକୁ ଆକଳନ କରିବାର ମାପଦଣ୍ଡ ତାହେଲେ ଖଣି ଓ ଶିଳ୍ପ ସମୃଦ୍ଧ ଯାଜପୁର ଜିଲ୍ଲା ଏହି ମାପଦଣ୍ଡରେ କେଉଁଠି ଠିଆ ହୋଇଛି ରାଜ୍ୟ ସରକାର ଏହାର ଉତର ଦେବା ସହ ଉତରଦାୟିତ୍ୱ ନିଜ ମୁଣ୍ଡ ଉପରେ ନେବା ପାଇଁ ବିଜେପି ପ୍ରତିନିଧି ଦଳର ପ୍ରତିନିଧି ବିଧାୟକ ରବି ନାରାୟଣ ନାଏକ, ପ୍ରଦୀପ ପୁରୋହିତ, ରାଜ୍ୟ ଉପସଭାପତି ସମୀର ମହାନ୍ତି ପ୍ରମୁଖ ଗଣମାଧ୍ୟମରେ ପ୍ରଶ୍ନ କରିଛନ୍ତି।
ସେମାନଙ୍କ ଗସ୍ତ ସମୟରେ ତଳ ନଗଡା, ମଝି ନଗଡା ଓ ଉପର ନଗଡା ତିନି ଗ୍ରାମ ସମେତ ଏହାର ଆଖପାଖ ଜନବସତି ବୁଲି ଦେଖିବା ସହ ସ୍ଥାନୀୟ ଲୋକଙ୍କ ସହିତ ସେମାନଙ୍କର ସୁବିଧା ଅସୁବିଧା ପଚାରି ବୁଝିଥିଲେ ବୋଲି ଗଣ ମାଧ୍ୟମକୁ ସୂଚନା ଦେଇ ପ୍ରତିନିଧି ଦଳ ପ୍ରକାଶ କରିଛି। ନଗଡାବାସୀ ପିଇବା ପାଣି, ବିଜୁଳି ଭଳି ମୈାଳିକ ସୁବିଧାରୁ ବଂଚିତ ଅଛନ୍ତି। ସେଠି ସରକାରୀ ବ୍ୟବସ୍ଥାର କୈାଣସି ଚିହ୍ନବର୍ଣ୍ଣ ନାହିଁ। ଆଜି ପର୍ଯ୍ୟନ୍ତ ସେଠାକୁ ଜଣେବି ସରକାରୀ କର୍ମଚାରୀ ଯାଇନଥିଲେ। ସମ୍ବିଧାନର ୨୧ ଧାରା ଅନୁସାରେ ବଂଚିବାର ଅଧିକାର ସମସ୍ତଙ୍କର ଥିବାର ଉଲ୍ଲେଖ ଥିବାବେଳେ ନଗଡା ଗ୍ରାମବାସୀ ସମ୍ବିଧାନର ଏହି ନିୟମରୁ ବହୁ ଦୂରରେ ଅଛି। ଦୁଇ ମାସ ଭିତରେ ଏହି ଛୋଟିଆ ଜୁଆଙ୍ଗ ଜନବସତିରେ ୧୯ ପିଲାଙ୍କର ଅକାଳ ବିୟୋଗ ହୋଇଥିବା ବେଳେ ଶେଷ ଦୁଇ ମୃତ ପିଲାଙ୍କ ପୋଷ୍ଟମର୍ଟମ ରିପୋର୍ଟ ସେମାନେ ଅତି ପୁଷ୍ଟିହୀନତା ଓ ମ୍ୟାଲେରିଆ ସମେତ ଅନ୍ୟାନ୍ୟ ସ୍ୱାସ୍ଥ୍ୟଗତ ସମସ୍ୟା ମୃତ୍ୟୁର କାରଣ ବୋଲି ସ୍ପଷ୍ଟ ହୋଇଛି। ଏହି ଅଂଚଳରେ ବିକାଶ କାମ କରିବା ପାଇଁ ଅର୍ଥର ଅଭାବ ନାହିଁ। କେନ୍ଦ୍ର ଓ ରାଜ୍ୟ ସରକାରଙ୍କର ବିଭିନ୍ନ ଯୋଜନା ସମେତ ଏହି ଅଂଚଳରେ ଜୁଆଙ୍ଗ ଜନଜାତିର ଲୋକ ରହୁଥିବା କାରଣରୁ ଏହି ଜନଜାତି ବିକାଶ ପାଇଁ ଉଦ୍ଦିଷ୍ଟ ବିଶେଷ ଅର୍ଥ ରାଜ୍ୟ ସରକାରଙ୍କର ପାଖରେ ଉପଲବ୍ଧ ରହିଛି। ଅର୍ଥ ପ୍ରତିବନ୍ଧକ ନ ହୋଇଥିବା ପରେ ମଧ୍ୟ ବିକାଶର ସର୍ବନିମ୍ନ ଆବଶ୍ୟକତା ନ ପହଂଚିବା ସରକାରଙ୍କର ସ୍ଥାଣୁତା ଓ ଅପାରଗତାର ନମୁନା ଛଡା ଏହାକୁ କଣ କୁହାଯାଇ ପାରିବ ବୋଲି ବିଜେପିର ଏହି ପ୍ରତିନିଧି ଦଳ ପ୍ରଶ୍ନ କରିଛି। ଏହି ଅଂଚଳରେ ରହୁଥିବା ସମସ୍ତ ପରିବାର କେନ୍ଦ୍ର ସରକାରଙ୍କର ଖାଦ୍ୟ ସୁରକ୍ଷା ଆଇନରେ ସାମିଲ ହେବା ପାଇଁ ଯୋଗ୍ୟ ହୋଇଥିବା ବେଳେ ଗାଁର କିଛି ଲୋକ ସାମିଲ ହେବା ଓ କିଛି ଲୋକ ବାହାରେ ରହିବା ପଛର ରହସ୍ୟ କଣ ତାହା ରାଜ୍ୟ ସରକାର ସ୍ପଷ୍ଟ କରିବା ଉଚିତ ବୋଲି ବିଜେପି ପ୍ରତିନିଧି ଦଳ କହିଛି।
ଗାଁର କିଛି ପରିବାର ପୂର୍ବରୁ ଇନ୍ଦିରା ଆବାସରେ ଘର ମିଳିଥିବାର ଖବର ଓ କାଗଜ ପତ୍ରରେ ସ୍ୱାକ୍ଷର କରିଥିଲେ ମଧ୍ୟ ଇନ୍ଦିରା ଆବାସ ପହଂଚି ନାହିଁ। ସ୍ଥାନୀୟ ବିଜେଡି ନେତା ସବିର ଖାଁ ସେମାନଙ୍କ ପାଇଁ ଉଦ୍ଦିଷ୍ଟ ଅର୍ଥ ଆତ୍ମସାତ କରିଥିବା ଗାଁ ଲୋକେ ଅଭିଯୋଗ କରିଛନ୍ତି। ଏହି ଲୋକମାନଙ୍କୁ ଘର ମିଳିଛି ନା ନାହିଁ, ସରକାରୀ ରେକର୍ଡ କଣ କହୁଛି ତାହା ସ୍ପଷ୍ଟ କରିବା ପାଇଁ ସରକାରଙ୍କ ନିକଟରେ ପ୍ରତିନିଧି ଦଳ ଦାବୀ କରିଛି। ସରକାରଙ୍କର ପୁଷ୍ଟିକର ଖାଦ୍ୟ ଯୋଜନାରେ ଯୋଗାଇ ଦିଆଯାଉଥିବା ଛତୁଆ ଅତ୍ୟନ୍ତ ନିମ୍ନମାନର ଓ ଖାଇବା ଉପଯୋଗୀ ନୁହେଁ ବୋଲି ପ୍ରତିନିଧି ଦଳ ଅଭିଯୋଗ କରିଛି। ମାତୃ ମୃତ୍ୟୁ ହାରରେ ଓଡିଶା ଦେଶରେ ଏକ ନମ୍ବର ଓ ଶିଶୁ ମୃତ୍ୟୁ ହାରରେ ଓଡିଶା ଦେଶରେ ଦୁଇ ନମ୍ବର ଏବଂ ଏହାର ମୁଖଶାଳା ନଗଡା ବୋଲି ବିଜେପି ପ୍ରତିନିଧି ଦଳ କହିବା ସହ ସ୍ଥାଣୁତା ଓ ଅପରାଗତାର ସୀମା ରାଜ୍ୟ ସରକାର ଉଲ୍ଲଂଘନ କରିଛନ୍ତି ବୋଲି ଦଳ କହିଛି। ବିଧାୟକ ଶ୍ରୀ ରବି ନାରୟଣ ନାଏକଙ୍କ ନେତୃତ୍ୱରେ ଏହି ୧୦ ଜଣିଆ ବିଜେପି ପ୍ରତିନିଧି ଦଳରେ ବିଧାୟକ ଶ୍ରୀ ପ୍ରଦୀପ ପୁରୋହିତ, ରାଜ୍ୟ ଉପସଭାପତି ସମୀର ମହାନ୍ତି, ସୁଶ୍ରୀ ସୁକେଶି ଓରାମ, ପୂର୍ବତନ ମନ୍ତ୍ରୀ ସମୀର ଦେ, ସଂଚିତା ମହାନ୍ତି, ରାଜ୍ୟ ସମ୍ପାଦକ ଦିଲୀପ ମଲ୍ଲିକ, ଶିଶିର ଗମାଙ୍ଗ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶ୍ରୀ ବିଷ୍ଣ ୁଦାସ ଓ ଯାଜପୁର ଜିଲ୍ଲା ସଭାପତି ଆଶୁତୋଷ ପରିଡାଙ୍କ ସମେତ ଜିଲ୍ଳାର ବହୁ କାଯ୍ୟକର୍ତା ନଗଡାକୁ ଯାଇଥିଲେ।

Share in top social networks!