ମହିଳା ମାନଙ୍କ ପାଇଁ ସମାଜର ଦୃଷ୍ଟିଭଙ୍ଗୀରେ ପରିବର୍ତ୍ତନ ଆବଶ୍ୟକ –ମୁଖ୍ୟମନ୍ତ୍ରୀ

08 STATE LEVEL INTERNATIONAL WOMENS DAY  (3) (1)ନାରୀ ମାନଙ୍କ ‘ସୁରକ୍ଷା’ଆଜି ସବୁଆଡେ ଆଲୋଚନାର କେନ୍ଦ୍ର ହୋଇଛି । ଉଭୟକେନ୍ଦ୍ର ଓ ରାଜ୍ୟ ସରକାର ନାରୀମାନଙ୍କ ସୁରକ୍ଷାକୁ ପ୍ରଥମିକତା ଦେଇ ଆଇନ ଓ ବ୍ୟବସ୍ଥା ରେ ପରିବର୍ତ୍ତନ ଆଣୁଛନ୍ତି । ରାଜ୍ୟ ସରକାର ଏଥିପାଇଁ ଅନେକ ପଦକ୍ଷେପ ନେଇଛନ୍ତି ଓ ଆଗକୁ ମଧ୍ୟ ନେବେ । ତେବେ ନାରୀ ସୁରକ୍ଷା କ୍ଷେତ୍ରରେ ସବୁଠାରୁ ବଡ ସମସ୍ୟା ହେଉଛି ସମାଜର ଦୃଷ୍ଟିଭଙ୍ଗୀ । ସମାଜକୁ ଏହି ଉଗ୍ର ମାନସିକତା ବିରୋଧରେ ଲଢିବାକୁ ହେବ । ସମାଜର ସବୁ ସ୍ତରରେ ଏଥିପାଇଁ ଉଦ୍ୟମ ହେବା ଆବଶ୍ୟକ । ଆଜି ସ୍ଥାନୀୟ ବରମୁଣ୍ଡା ବିଜୁ ପଟ୍ଟନାୟକ ଖେଳ ପଡିଆ ଠାରେ ଆୟୋଜିତ ‘ଆନ୍ତର୍ଜାତିକ ମହିଳା ଦିବସ’ ପାଳନ ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଏହା କହିଛନ୍ତି ।

ମୁଖ୍ୟମନ୍ତ୍ରୀ ଆଶା ପ୍ରକାଶ କରିଥିଲେ ଯେ ଆଗାମୀ ଦିନରେ ସମାଜରେ ପରିବର୍ତ୍ତନ ଆସିବା ଓ ମହିଳା ମାନେ ପ୍ରତ୍ୟେକ କ୍ଷେତ୍ରରେ ନିଜର ‘ସମ୍ମାନ’ଓ ‘ପ୍ରତିଷ୍ଠା’କୁ ଜାହିର କରିବାରେ ସଫଳ ହେବେ । ମୁଖ୍ୟମନ୍ତ୍ରୀ କହିଥିଲେ ଯେ,ମହିଳାମାନେ ଜନ୍ମଗତଭାବେ ଉତ୍ତମ ନେତୃତ୍ବର ଅଧିକାରିଣୀ । ଘର ପରିବାର ଠାରୁ ଆରମ୍ଭ କରି ପଞ୍ଚାୟତ ଓ ଦେଶ ପର୍ଯ୍ୟନ୍ତ ଏବଂ ବଡ ବଡ କର୍ପୋରେଟ ହାଉସ ପରିଚାଳନା କରିବା କ୍ଷେତ୍ରରେ ମହିଳାମାନେ ସେମାନଙ୍କର ପରାକାଷ୍ଠା ପ୍ରଦର୍ଶନ କରିପାରିଛନ୍ତି । ମହିଳାମାନଙ୍କ ଉନ୍ନତି ପାଇଁ ବିଜୁବାବୁଙ୍କ ଅବଦାନକୁ ସ୍ମରଣ କରି ମୁଖ୍ୟମନ୍ତ୍ରୀ କହିଲେ ଯେ ବିଜୁବାବୁ ମହିଳାମାନଙ୍କ ନେତୃତ୍ଵ ନେବାର ପ୍ରତିଭାକୁ ହୃଦୟଙ୍ଗମ କରି ସରକାରୀ ଚାକିରି,ପଞ୍ଚାୟତ ପଞ୍ଚାୟତିରାଜ ଅନୁଷ୍ଠାନ ମାନଙ୍କରେ ଓ ପୌରପରିଷଦ ମାନଙ୍କରେ ମହିଳା ମାନଙ୍କ ପାଇଁ 33%ସଂରକ୍ଷଣ କରିଥିଲେ ।

ରାଜ୍ୟ ସରକାର ମଧ୍ୟ ମହିଳାମାନଙ୍କ ପାଇଁ ଅନେକ ପଦକ୍ଷେପ ନେଇଛନ୍ତି । ପଞ୍ଚାୟତିରାଜ ଅନୁଷ୍ଠାନ ଓ ପୌର ପରିଷଦରେ ମହିଳା ମାନଙ୍କ ସଂରକ୍ଷଣ କୁ 50% କୁ ବୃଦ୍ଧି କରାଯାଇଛି । ଗତ ପଞ୍ଚାୟତ ନିର୍ବାଚନରେ ନିର୍ବାଚିତ ମହିଳା ପ୍ରତିନିଧୀମାନେ ବହୁତ ଭଲ କାମ କରୁଛନ୍ତି । ମହିଳା ମାନଙ୍କ ‘ମିସନ ଶକ୍ତି’ କାର୍ଯ୍ୟକ୍ରମ ଆଜି ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି । ଲକ୍ଷଲକ୍ଷ ମହିଳା ଆଜି ‘ମିସନ ଶକ୍ତି’ ଜରିଆରେ ନିଜସ୍ୱ ପରିଚୟ ସୃଷ୍ଟି କରିପାରିଛନ୍ତି । ମମତା କାର୍ଯ୍ୟକ୍ରମରେ ମହିଳା ଓ ଶିଶୁ ମାନଙ୍କ ସ୍ୱାସ୍ଥ୍ୟ ଓ ପୁଷ୍ଟିରେ ଉନ୍ନତି ପାଇଁ ଭଲ କାମ ହେଉଛି । ଦିନ ମଜୁରିଆ ଭାବେ କାମ କରୁଥିବା ମହିଳା ମାନଙ୍କ ପାଇଁ ସ୍କୁଲ,କଲେଜ,ଓ ହଷ୍ଟେଲ ଠାରୁ ଆରମ୍ଭ କରି ବୃତ୍ତି,ଷ୍ଟାଇପେଣ୍ଡ,ସାଇକେଲ ଓ ପୋଷାକ ଆଦିର ବ୍ୟବସ୍ଥା କରାଯାଉଛି ବୋଲି ମୁଖ୍ୟମନ୍ତ୍ରୀ କହିଥିଲେ । ମହିଳା ମାନଙ୍କ କ୍ଷେତ୍ରରେ ଏବେ ବଡ ପରିବର୍ତ୍ତନ ଆସୁଛି । ମହିଳାମାନେ ସବୁ କ୍ଷେତ୍ରରେ ନିଜର ଦକ୍ଷତାକୁ ଉପଯୋଗ କରିବାକୁ ଆଗେଇ ଆସୁଛନ୍ତି । ଆଗାମୀ ଦିନରେ ମହିଳାମାନେ ସଚେତନ ହୋଇ ସମାଜରେ ନିଜର ଅବଦାନ ରଖିବେ ବୋଲି ମୁଖ୍ୟମନ୍ତ୍ରୀ କହିଥିଲେ । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ,ବିଶିଷ୍ଟ ଔପନାସିକା ପଦ୍ମଶ୍ରୀ ପ୍ରତିଭା ରାୟ,କ୍ରୀଡାବିତ ପ୍ରମିଳା କିରସାନି,ସୁକାନ୍ତି ରାଉଳ ଓ ରୋସନାରା ପାରବୀନ ଙ୍କୁ ସମ୍ମନିତ କରିଥିଲେ ।

କବିସୂର୍ଯ୍ୟ ନଗର ବିଧୟିକା ଶ୍ରୀମତୀ ଭି. ସୁଜ୍ଞାନ କୁମାରୀ ଦେଓ ଙ୍କ ଅନୁପସ୍ଥିତିରେ ତାଙ୍କ ସମ୍ମାନରେ ଏକ ମାନପତ୍ର ପାଠ କରାଯାଇଥିଲା । ମୁଖ୍ୟମନ୍ତ୍ରୀ ଏହି ଅବସରରେ ରାଜ୍ୟ ମହିଳା କମିଶନର ଏକ website କୁ ଉନ୍ମୋଚନ କରିଥିଲେ ଏବଂ ସ୍ଵୟଂ ସହାୟିକା ଗୋଷ୍ଠୀମାନଙ୍କୁ seed money ପ୍ରଦାନ କରିଥିଲେ । ଏହି ଅବସରରେ ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ଉଷାଦେବୀ,ହସ୍ତତନ୍ତ,ବୟନଶିଳ୍ପ ଓ ହସ୍ତଶିଳ୍ପ ମନ୍ତ୍ରୀ ଶ୍ରୀମତୀ ସରୋଜିନୀ ହେମ୍ବ୍ରମ ,ସାଂସଦ ଡଃ ପ୍ରସନ୍ନ କୁମାର ପାଟ୍ଟଶାଣୀ ,ଓଡିଶା ସମାଜ ମଙ୍ଗଲ ବୋର୍ଡର ଅଧ୍ୟକ୍ଷା ଶ୍ରୀମତୀ ନିବେଦିତା ନାୟକ,ରାଜ୍ୟ ମହିଳା କମିଶନର ଅଧ୍ୟକ୍ଷା ଡଃ ଲୋପାମୁଦ୍ରା ବକ୍ସିପତ୍ର,ବିଧ୍ୟାୟକ ଶ୍ରୀ ଅଶୋକ ଚନ୍ଦ୍ର ପଣ୍ଡା,ବିଧାୟକ ଶ୍ରୀ ଭାଗୀରଥୀ ବଡଜେନା, ବିଧାୟକ ଶ୍ରୀ ବିଜୟ କୁମାର ମହାନ୍ତି ,ମହିଳା ଓ ଶିଶୁ ବିକାଶ ବିଭାଗ ସଚିବ ଶ୍ରୀମତୀ ଆରତୀ ଆହୁଜା ପ୍ରମୁଖ ଉପସ୍ଥିତ ଥିଲେ ।

ସ୍ଵତନ୍ତ୍ର ମହିଳା ବସର ଶୁଭାରମ୍ଭ:ଆଜି ପୂର୍ବାହ୍ନରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ AG ଛକ ନିକଟସ୍ଥ ପରିବହନ ଠାରେ ମହିଳା ମାନଙ୍କ ପାଇଁ ଏକ ସ୍ଵତନ୍ତ୍ର ବସ୍ କୁ ପତାକା ଦେଖାଇ ଚଳାଚଳ ର ଶୁଭାରମ୍ଭ କରିଥିଲେ । ଏହି ବସ କଟକରୁ ଭୁବନେଶ୍ଵର ଓ ଭୁବନେଶ୍ଵରରୁ କଟକ ଯାତାୟାତ କରିବା।

Share in top social networks!