ଦୁବାଇରେ ବିଜୁ ପଟ୍ଟନାୟକଙ୍କ ଜନ୍ମ ଶତବାର୍ଷିକୀ ପାଳିବେ ପ୍ରବାସୀ ଓଡ଼ିଆ

dubaiମଧ୍ୟପ୍ରାଚ୍ୟରେ ରହୁଥିବା ପ୍ରବାସୀ ଓଡ଼ିଆମାନେ କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମ ଶତବାର୍ଷିକୀ ପାଳନ କରିବେ। ଚଳିତ ମାସ ୮ ତାରିଖରେ ଦୁବାଇଠାରେ ଏଥିପାଇଁ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହେବାକୁ ଯାଉଛି।

ଶିଳ୍ପ ଓ ଗଣଶିକ୍ଷା ମନ୍ତ୍ରୀ ଦେବୀ ପ୍ରସାଦ ମିଶ୍ର ଏହି ଉତ୍ସବରେ ମୁଖ୍ୟଅତିଥି ଭାବରେ ଯୋଗଦେବାର କାର୍ଯ୍ୟକ୍ରମ ରହିଛି। ବିଜୁ ପଟ୍ଟନାୟକଙ୍କ ଜନ୍ମ ଶତବାର୍ଷିକୀ ପାଳନ ଅବସରରେ ଏହା ହେବ ବିଦେଶରେ ହେଉଥିବା ପ୍ରଥମ କାର୍ଯ୍ୟକ୍ରମ।

ଏହି ଗସ୍ତ ସମୟରେ ରାଜ୍ୟ ପାଇଁ ସମ୍ଭାବ୍ୟ ପୁଞ୍ଜି ବିନିଯୋଗକୁ ଆମନ୍ତ୍ରଣ କରିବା ପାଇଁ ଶିଳ୍ପମନ୍ତ୍ରୀ ଶ୍ରୀ ମିଶ୍ର ୟୁଏଇର ବିଭିନ୍ନ ଭାଗରେ ଥିବା ପୁଞ୍ଜିଲଗାଣକାରୀ ସଂସ୍ଥା ତଥା ଶିଳ୍ପପତିମାନଙ୍କ ସହ ଆଲୋଚନା କରିବେ।

ଦୁବାଇରେ ଅବସ୍ଥାପିତ ଓଡ଼ିଆ ଚଳଚ୍ଚିତ୍ର ନିର୍ମାତା ତଥା ଶିଳ୍ପୋଦ୍ୟୋଗୀ ଅକ୍ଷୟ ପରିଜା କହିଛନ୍ତି ଯେ, “ବିଜୁ ପଟ୍ଟନାୟକଙ୍କ ଭଳି ଜଣେ ମହାନ୍‍ ବ୍ୟକ୍ତିତ୍ୱ ଓ ରାଷ୍ଟ୍ରନୀତିଜ୍ଞଙ୍କ ଶତବାର୍ଷିକୀ ପାଳନ କରିବା ଆମ ପାଇଁ ଗୌରବର କଥା। ମୋର ବିଶ୍ୱାସ, ଏହି କାର୍ଯ୍ୟକ୍ରମ ମାଧ୍ୟମରେ ବିଜୁବାବୁଙ୍କର ଶିଳ୍ପୋଦ୍ୟୋଗୀ ଚେତନା ଓ ଦୂରଦୃଷ୍ଟି ୟୁଏଇରେ ଥିବା ପ୍ରବାସୀ ଓଡ଼ିଆ ବିଶେଷକରି ଯୁବସମାଜକୁ ଅନୁପ୍ରାଣିତ କରିବ।“ ସେ ଆହୁରି ମଧ୍ୟ କହିଥିଲେ ଯେ, “ଏହି ଉତ୍ସବର ଦୁଇଟି ବିଶେଷତ୍ୱ ହେଉଛି- ବିଜୁ ଶତବାର୍ଷିକୀ ପାଳନ ସହିତ ଓଡିଶା ପାଇଁ ପୁଞ୍ଜିଲଗାଣର ନୂତନ ସୁଯୋଗ ସୃଷ୍ଟି କରିବା।”

ୟୁଏଇ ଓଡ଼ିଆ ସଂଗଠନର ସଭାପତି ଅମିୟ ମିଶ୍ର କହିଛନ୍ତି ଯେ, “ୟୁଏଇରେ ଥିବା ଓଡ଼ିଆମାନେ ବିଜୁ ପଟ୍ଟନାୟକଙ୍କ ଭଳି ଜଣେ କିମ୍ବଦନ୍ତୀ ପୁରୁଷଙ୍କୁ ତାଙ୍କ ଜନ୍ମ ଶତବାର୍ଷିକୀରେ ମନେପକାଇବା ଏକ ବିରଳ ସୁଯୋଗ ହେବ। ବିଶେଷକରି ଭାରତ ବାହାରେ ଏଭଳି କାର୍ଯ୍ୟକ୍ରମ ମାଧ୍ୟମରେ ଆମର ମହାନ ସଂସ୍କୃତି ଓ ବିଜୁବାବୁଙ୍କ ଭଳି ଜଣେ ଜାତୀୟ ବ୍ୟକ୍ତିତ୍ୱଙ୍କୁ ପ୍ରଦର୍ଶନ କରିବା ବିଦେଶରେ ଥିବା ଓଡ଼ିଆଙ୍କ ପାଇଁ ଏକ ଗର୍ବର ବିଷୟ।“ ଉଭୟ ପ୍ରବୀଣ ଓ ତରୁଣ ପିଢ଼ିଙ୍କୁ ଗୋଟିଏ ସୂତ୍ରରେ ଯୋଡିବା ପାଇଁ ବିଜୁବାବୁ ଆଜି ବି ଏକ ଆଦର୍ଶ ବୋଲି ସେ କହିଛନ୍ତି।

ମଧ୍ୟପ୍ରାଚ୍ୟ ଦେଶସମୂହ ସାଉଦି ଆରବ, କତାର, ବାହାରିନ୍‍, କୁଏତ୍‍, ଓମାନ୍‍ ଓ ଆବୁଧାବି ଆଦି ସ୍ଥାନରେ ବହୁସଂଖ୍ୟକ ଓଡ଼ିଆ ବସବାସ କରୁଛନ୍ତି। ତେଣୁ ବିଜୁବାବୁଙ୍କ ଶତବାର୍ଷିକୀ ଅବସରରେ ଦୁବାଇରେ ହେବାକୁ ଥିବା ଏହି ଉତ୍ସବରେ ଅନେକ ଓଡ଼ିଆ ଯୋଗ ଦେଇ ବିଜୁବାବୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବେ ବୋଲି ଆୟୋଜକମାନେ ଆଶାପ୍ରକାଶ କରିଛନ୍ତି।

Share in top social networks!

ମାର୍ଚ୍ଚ ୫ରେ ବିଜୁ ପଟ୍ଟନାୟକ ଜନ୍ମ ଶତବାର୍ଷିକୀର ରାଜ୍ୟସ୍ତରୀୟ ସମାବେଶ

bijucentnaryପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମ ଶତବାର୍ଷିକୀ ବର୍ଷ ତମାମ ବିଭିନ୍ନ ସ୍ତରରେ, ବିଭିନ୍ନ
କାର୍ଯ୍ୟକ୍ରମ ମାଧ୍ୟମରେ ପାଳନ କରିବା ପାଇଁ ନିଷ୍ପତ୍ତି ନିଆଯାଇଛି । ଏଥିପାଇଁ ମାନ୍ୟବର ମୁଖ୍ୟମନ୍ତ୍ରୀ ତଥା ବିଜୁ ଜନତା ଦଳର
ସଭାପତି ଶ୍ରୀଯୁକ୍ତ ନବୀନ ପଟ୍ଟନାୟକ ୫ଟି କମିଟି ଗଠନ କରିଛନ୍ତି । ଜନ୍ମ ଶତବାର୍ଷିକୀ ସମାରୋହର ଶୁଭାରମ୍ଭ ମାର୍ଚ୍ଚ ୫ ତାରିଖରୁ
ଆରମ୍ଭ ହେବ । ଏହି ଉପଲକ୍ଷେ ଭୁବନେଶ୍ୱର ବରମୁଣ୍ଡା ଖେଳପଡ଼ିଆ ଠାରେ ଏକ ରାଜ୍ୟସ୍ତରୀୟ ସ୍ମୃତିସଭାର ଆୟୋଜନ କରାଯାଇଛି ।
ଏଥିରେ ମାନ୍ୟବର ମୁଖ୍ୟମନ୍ତ୍ରୀଙ୍କ ସମେତ ମନ୍ତ୍ରିମଣ୍ଡଳର ସଦସ୍ୟବୃନ୍ଦ, ସାଂସଦବୃନ୍ଦ, ବିଧାୟକବୃନ୍ଦ, ଦଳର ବରିଷ୍ଠ କର୍ମକର୍ତ୍ତା,
ତୃଣମୂଳସ୍ତରୀୟ କର୍ମୀ ଓ ଶୁଭେଚ୍ଛୁ, ପଞ୍ଚାୟତ ଓ ପୌରସଂସ୍ଥାର ନିର୍ବାଚିତ ଲୋକପ୍ରତିନିଧି, ଛାମୁଆ ସଂଗଠନର କର୍ମକର୍ତ୍ତାମାନେ
ଯୋଗଦେବେ ।
ସ୍ୱାଧୀନତା ଆନେ୍ଦାଳନ ଓ ସ୍ୱାଧୀନତା ପରବର୍ତ୍ତୀ ରାଷ୍ଟ୍ର ଗଠନରେ ବିଜୁବାବୁଙ୍କର ଅବଦାନ ଅତୁଳନୀୟ । ଆଧୁନିକ ଓଡ଼ିଶାର ନବ
ନିର୍ମାଣରେ ତାଙ୍କର ଭୂମିକା ଉଲ୍ଲେଖନୀୟ । ତାଙ୍କର କର୍ମଭୂମି ବ୍ୟାପକ ଥିଲା । ତାଙ୍କ ସ୍ୱାଧୀନ ଓ କୃତିକୁ ଆଧାର କରି ତାଙ୍କର
ଜୀବନାଦର୍ଶର ବାର୍ତ୍ତା ନୂତନ ପିଢ଼ି ପାଖରେ ପହଞ୍ଚାଇ ସେମାନଙ୍କୁ ସମୃଦ୍ଧ ରାଜ୍ୟ ଗଠନରେ ଅନୁପ୍ରାଣିତ କରିବା ଆୟୋଜନର ମୁଖ୍ୟ
ଲକ୍ଷ୍ୟ । ଏହାକୁ ଦୃଷ୍ଟିରେ ରଖି ବିଜୁ ପଟ୍ଟନାୟକ ଶତବାର୍ଷିକୀ କମିଟି ପକ୍ଷରୁ ବ୍ୟାପକ କାର୍ଯ୍ୟକ୍ରମ ପରିକଳ୍ପନା କରାଯାଇଛି ।
ବିଜୁବାବୁଙ୍କ କର୍ମଭୂମି କେବଳ ଓଡ଼ିଶାରେ ସୀମିତ ନଥିଲା, ତେଣୁ ରାଜ୍ୟରେ, ଦେଶରେ ଓ ଦେଶ ବାହାରେ ମଧ୍ୟ ଜନ୍ମ ଶତବାର୍ଷିକୀ
ପାଳନ କରିବାକୁ ନିଷ୍ପତ୍ତି ହୋଇଛି । ବିଦେଶରେ ବିଶେଷକରି ଯେଉଁ ଦେଶରେ ବିଜୁବାବୁଙ୍କର କୃତି ଓ ସଂପୃକ୍ତି ରହିଥିଲା ସେ
ଦେଶରେ ଅଗ୍ରାଧିକାର ଭିତ୍ତିରେ ପାଳନ କରାଯିବ । ସେହିଭଳି ଜାତୀୟ ସ୍ତରରେ ଓ ଓଡ଼ିଆ ଅଧ୍ୟୁଷିତ ସ୍ଥାନମାନଙ୍କରେ ଏହା ପାଳନ
କରାଯିବ । ସମସ୍ତ କାର୍ଯ୍ୟକ୍ରମରେ ବାହାରେ କାର୍ଯ୍ୟ କରୁଥିବା ଓଡ଼ିଆ ସଂଗଠନଗୁଡିକର ସହାୟତା ଲୋଡ଼ାଯିବ ।
ବିଜୁବାବୁ ହେଉଛନ୍ତି ଓଡ଼ିଆ ସ୍ୱାଭିମାନ ଓ ସମୃଦ୍ଧିର ପ୍ରତୀକ । ତାଙ୍କର ସ୍ମୃତିଚାରଣ ମାଧ୍ୟମରେ ଓଡ଼ିଶାବାସୀଙ୍କୁ ଅନୁପ୍ରାଣିତ କରିବା
ଲକ୍ଷ୍ୟରେ ଓଡ଼ିଶାର କୋଣ ଅନୁକୋଣରେ ଗାଁ ଗଣ୍ଡା ଠାରୁ ଆରମ୍ଭ କରି ରାଜଧାନୀ ପର୍ଯ୍ୟନ୍ତ ପାଳନ କରାଯିବ । ଏଥିରେ ସମସ୍ତ
ଗୋଷ୍ଠୀ, ବର୍ଗ ଓ ବିଜୁ ପ୍ରେୀମାନଙ୍କୁ ସାମିଲ କରାଯିବ । ଶତବାର୍ଷିକୀ କାର୍ଯ୍ୟକ୍ରମକୁ ସରସ ସୁନ୍ଦର ମର୍ଯ୍ୟାଦାବନ୍ତ କରିବା ପାଇଁ ସମସ୍ତଙ୍କ
ଠାରୁ ପ୍ରସ୍ତାବ ଓ ପରାମର୍ଶ ଆହ୍ୱାନ କରାଯାଇଛି ଏବଂ ଏହାକୁ ସଂକଳିତ କରି ବର୍ଷବ୍ୟାପୀ କାର୍ଯ୍ୟକ୍ରମର ଚୂଡ଼ାନ୍ତ ଚିଠା ରୂପରେଖ
ପ୍ରସ୍ତୁତ ହେଉଛି ।

Share in top social networks!

ବିଜୁବାବୁଙ୍କ ଉପରେ ଡିଜିଟାଲ୍ ପ୍ଲାଟଫର୍ମ, ସ୍ୱତନ୍ତ୍ର କ୍ୟାଲେଣ୍ଡର, ଚିତ୍ର ଏବଂ ସ୍ୱତନ୍ତ୍ର ଡାକ ଲଫାପା ଉନ୍ମୋଚିତ

bijuuuଓଡ଼ିଶାର ବରପୁତ୍ର, ପୂର୍ବତନ ମୁଖ୍ୟମନ୍ତ୍ରୀ ତଥା ଭାରତୀୟ ରାଜନୀତିର କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମ ଶତବାର୍ଷିକୀ ଅବସରରେ ଓଡ଼ିଶାର ପ୍ରଥମ ୱେବ୍ ଚ୍ୟାନେଲ “ଓଡ଼ିଶା ଲାଇଭ୍” ପକ୍ଷରୁ ସ୍ୱତନ୍ତ୍ର କାର୍ଯ୍ୟକ୍ରମ ଉଦ୍ଘାଟିତ ହୋଇଯାଇଛି । ଏହି ଚ୍ୟାନେଲ ପକ୍ଷରୁ ଭୁବନେଶ୍ୱରରେ ଆୟୋଜିତ ଉତ୍ସବରେ ମୁଖ୍ୟଅତିଥି ଭାବେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭ ଉଦ୍୍ଘାଟନ କରିଛନ୍ତି ।
ପ୍ରବାଦ ପୁରୁଷ ବିଜୁବାବୁ ଥିଲେ ଜଣେ ଖାଂଟି ଓଡ଼ିଆ । ଆଜିର ସମାଜ ବିଶେଷକରି ଯୁବପିଢ଼ି ପାଇଁ ତାଙ୍କର ଆଦର୍ଶ ବେଶ୍ ପ୍ରାସଂଗିକ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହି ଜାତୀୟ ପୁରୁଷଙ୍କ ଶତବାର୍ଷିକୀ ଅବସରରେ ଓଡ଼ିଶା ଲାଇଭ୍୍ର ଏହା ଏକ ଅଭିନବ ଶ୍ରଦ୍ଧାଞ୍ଜଳି ବୋଲି ସେ ତାଙ୍କ ଭାଷଣରେ କହିଥିଲେ ।
ବିଜୁବାବୁଙ୍କ ଜନ୍ମଦିନର ଅବ୍ୟବହିତ ପୂର୍ବରୁ ମାର୍ଚ୍ଚ ୦୩ ତାରିଖ ଗୁରୁବାର ଦିନ ଓଡ଼ିଶା ଲାଇଭ୍୍ର “ଟ୍ରିବ୍ୟୁଟ୍ ଟୁ ଏ ଲିଜେଣ୍ଡ୍” କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଡିଜିଟାଲ୍ ପ୍ଲାଟଫର୍ମ “ବିଜୁପଟ୍ଟନାୟକଡଟ୍ଓଆରଜି”ର ଉନ୍ମୋଚନ କରିଥିଲେ । ଏହା ସହିତ ବଳଦେବ ମହାରାଥାଙ୍କ ଦ୍ୱାରା ପ୍ରସ୍ତୁତ ବିଜୁବାବୁଙ୍କ ଉପରେ ଚିତ୍ର ଏବଂ ବିଭିନ୍ନ ସୂତ୍ରରୁ ସଂଗୃହିତ ବିଜୁବାବୁଙ୍କ ବିରଳ ଓ ଐତିହାସିକ ଫଟୋଚିତ୍ର ଉପରେ ଆଧାରିତ ଓଡ଼ିଶା ଲାଇଭ୍ର ସ୍ୱତନ୍ତ୍ର କ୍ୟାଲେଣ୍ଡରକୁ ମୁଖ୍ୟମନ୍ତ୍ରୀ ଉନ୍ମୋଚନ କରିଥିଲେ ।
ଶତାବ୍ଦୀର ଅନ୍ୟତମ ଜନନାୟକ ତଥା ଭାରତୀୟ ରାଜନୀତିର ଜଣେ ଦୂରଦର୍ଶୀ ନେତୃତ୍ୱ ବିଜୁବାବୁଙ୍କ ଜନ୍ମ ଶତବାର୍ଷିକୀକୁ ସ୍ମରଣୀୟ କରିବା ପାଇଁ ଓଡ଼ିଶା ଲାଇଭ୍ ପକ୍ଷରୁ ଏକ ସ୍ୱତନ୍ତ୍ର ପୋଷ୍ଟାଲ୍ କଭର୍୍ ପ୍ରସ୍ତୁତ କରାଯାଇଛି । ଭାରତୀୟ ଡାକ ବିଭାଗ ଦ୍ୱାରା ଅନୁମୋଦିତ ଏହି “ସ୍ପେସାଲ୍ କଭର”କୁ ମୁଖ୍ୟମନ୍ତ୍ରୀ ଉନ୍ମୋଚନ କରିଥିଲେ । ଏହି ଅବସରରେ ଓଡ଼ିଶାର ମହାଡାକପାଳ ତିଲକ ଦେ ସ୍ପେସାଲ୍ କଭରର ଆଲ୍ବମ୍୍କୁ ମୁଖ୍ୟମନ୍ତ୍ରୀଙ୍କୁ ଅର୍ପଣ କରିଥିଲେ । ଏହି କଭର୍ରେ ବିଜୁବାବୁଙ୍କ ଜୀବନୀ ଉପରେ ସଂକ୍ଷିପ୍ତ ସୂଚନା ରହିବା ସହ ତାଙ୍କର କେତୋଟି ବିରଳ ଫଟୋ ସ୍ଥାନ ପାଇଛି । ଓଡ଼ିଶା ଲାଇଭ୍ର ଏହି ଉଦ୍ୟମକୁ ପ୍ରଶଂସା କରିବା ସହ ଭାରତୀୟ ଡାକଟିକଟପ୍ରେମୀଙ୍କ ପାଇଁ ବିଜୁବାବୁଙ୍କ ଏହି କଭର୍ ଏକ ଆକର୍ଷଣ ହେବ ବୋଲି ମହାଡାକପାଳ କହିଛନ୍ତି ।
ବିଜୁବାବୁଙ୍କ ପରି ଜଣେ ରାଷ୍ଟ୍ରନୀତିଜ୍ଞଙ୍କ ଜୀବନ ଓ ବିଚାରଧାରାକୁ ଜାତୀୟ ତଥା ଅନ୍ତର୍ଜାତୀୟ ସ୍ତରରେ, ବିଶେଷକରି ଯୁବପିଢ଼ିଙ୍କ ମଧ୍ୟରେ ପରିଚିତ କରିବା ପାଇଁ ଆଜିର ଡିଜିଟାଲ୍ ମିଡିଆ ଶ୍ରେଷ୍ଠ ମାଧ୍ୟମ ବୋଲି ଉଦ୍ୟମ ବୋଲି ଓଡ଼ିଶା ଲାଇଭ୍ର ପ୍ରତିଷ୍ଠାତା ତଥା ସମ୍ପାଦକ ନୀଳାମ୍ବର ରଥ କହିଥିଲେ । ବିଜୁପଟ୍ଟନାୟକଡଟ୍ଓଆରଜି ୱେବ୍ସାଇଟ୍ ମାଧ୍ୟମରେ ଏହି ମହାନାୟକଙ୍କ ଜୀବନ ଉପରେ ତଥ୍ୟ, ଲେଖା, ଫଟୋଚିତ୍ର, ଅଡିଓ ଏବଂ ଭିଡିଓ ଉପସ୍ଥାପନ କରିବାକୁ ଉଦ୍ୟମ କରାଯାଉଛି । ଆଗାମୀ ଦିନରେ ଏହା ବିଜୁବାବୁଙ୍କୁ ସ୍ମରଣ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ଡିଜିଟାଲ୍ ମିଡିଆ ହେବ ବୋଲି ଶ୍ରୀ ରଥ ପ୍ରକାଶ କରିଥିଲେ । ଏହି ୱେବ୍ସାଇଟ୍ରେ ବର୍ତମାନ ଓଡ଼ିଆ ଏବଂ ଇଂରାଜୀ ଭାଷାରେ ତଥ୍ୟ ଉପସ୍ଥାପନ କରାଯାଉଥିବା ବେଳେ ଆଗାମୀ ଦିନରେ ଏହାକୁ ହିନ୍ଦୀ ଭାଷାରେ କରାଯିବା ପାଇଁ ଉଦ୍ୟମ କରାଯିବ ବୋଲି ସେ କହିଛନ୍ତି ।
ଓଡ଼ିଶା ଲାଇଭ୍ ବିଜୁ ଜନ୍ମଶତବାର୍ଷିକୀ କନ୍କ୍ଲେଭ୍ର ଅନ୍ୟତମ ଆକର୍ଷଣ ଥିଲା ବିଜୁବାବୁଙ୍କ ଉପରେ ଆଧାରିତ ବିଶେଷ ଆଲୋଚନାଚକ୍ର । ଏଥିରେ ସ୍ୱାଧୀନତାସଂଗ୍ରାମୀ ଭବାନୀ ଚରଣ ପଟ୍ଟନାୟକ, ପୂର୍ବତନ ମୁଖ୍ୟ ଶାସନ ସଚିବ ସୁଧାଂଶୁ ଭୂଷଣ ମିଶ୍ର, ବରିଷ୍ଠ ସାମ୍ବାଦିକ ବସନ୍ତ ଦାସ, ପୂର୍ବତନ ମହିଳା କମିଶନର ଅଧ୍ୟକ୍ଷା ଲୋପାମୁଦ୍ରା ମହାନ୍ତି, ଲେଖକ ନଟବର ଖୁଂଟିଆ, ବରିଷ୍ଠ ନେତା ଅମର ଶତପଥୀ, ରାଜନୀତି ବିଜ୍ଞାନୀ ପ୍ରଫେସର ସୂର୍ଯ୍ୟନାରାୟଣ ମିଶ୍ର ଏବଂ ଶିଳ୍ପବିଶେଷଜ୍ଞ ଡକ୍ଟର ଏସ୍. କେ. ତାମୋତିଆ ପ୍ରମୁଖ ଯୋଗଦେଇ ବିଜୁବାବୁଙ୍କ ବଳିଷ୍ଠ ବ୍ୟକ୍ତିତ୍ୱର ବିଭିନ୍ନ ଦିଗ ଉପସ୍ଥାପନ କରିଥିଲେ ।
ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଶିଳ୍ପ ଓ ଗଣଶିକ୍ଷା ମନ୍ତ୍ରୀ ଦେବୀପ୍ରସାଦ ମିଶ୍ର ଉଦ୍ଘାଟନୀ ସମାରୋହରେ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଓଡ଼ିଶା ଲାଇଭ୍ର ପରାମର୍ଶଦାତା କ୍ଷୀରୋଦ କୁମାର ଜେନା, ନିଦେ୍ର୍ଦଶିକା ପ୍ରଣତି ପରିଡ଼ା ଏବଂ ବିଜ୍ଞାପନ ଓ ବ୍ରାଣ୍ଡିଂ ବିଭାଗ ମୁଖ୍ୟ ସନ୍ଦୀପ ବେହେରା ଉପସ୍ଥିତ ଥିଲେ । ଏହି ସମାରୋହରେ ରାଜ୍ୟର ପ୍ରମୁଖ ରାଜନୈତିକ ବ୍ୟକ୍ତିତ୍ୱ, ବୁଦ୍ଧିଜୀବୀ, ସାମ୍ବାଦିକ ଓ ବହୁ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ଏହି କନ୍କ୍ଲେଭ୍ର ବିଭିନ୍ନ କାର୍ଯ୍ୟକ୍ରମକୁ ଦେବପ୍ରସାଦ ଦାଶ ଏବଂ ଶୁଭେନ୍ଦୁ ମହାନ୍ତି ଉପସ୍ଥାପନ କରିଥିଲେ ।
ଏହି ଅବସରରେ ବରିଷ୍ଠ ଚିତ୍ରଶିଳ୍ପୀ ବଳଦେବ ମହାରଥା ଏବଂ ଇଷ୍ଟର୍ନ ପ୍ରେସ୍ଏଜେନ୍ସି (ଇପିଏ)ର ପ୍ରତିଷ୍ଠାତା ଓ ସମ୍ପାଦକ ଅନୀଲ ପ୍ରସାଦ ମିଶ୍ରଙ୍କୁ ବିଜୁବାବୁଙ୍କ ସ୍ମୃତିକୁ ଉଜ୍ଜୀବିତ କରି ରଖିବା ପାଇଁ ଓଡ଼ିଶା ଲାଇଭ୍ ପକ୍ଷରୁ ସମ୍ମାନିତ କରାଯାଇଥିଲା ।

Share in top social networks!