ତମେ ଆସ

କବୟିତ୍ରୀ: ଅମିତା ଦାସ, ପ୍ରକାଶିକା: ମୀନାକୁମାରୀ ଦାସ, ବାଲିକୁଦା, ଜଗତସିଂହପୁର,
ମୂଲ୍ୟ: ୪୦ ଟଙ୍କା, ପୃଷ୍ଠା: ୩୬
‘ପାଇବା’ ପାଇବାପରି ନ ହେଉ ପଛେ ହରାଇବାର ଦୁଃଖ ଏତେ ଗଭୀର କାହିଁକି? କେବେ ମୌଖିକ ପ୍ରତିଶ୍ରୁତି ଦେଇ ନ ଥିବା ପାନ୍ଥ ପାଇଁ ପ୍ରତୀକ୍ଷାଏ ଅନ୍ତ ନାହିଁ | ଆସା କାହିଁକି
ଦାନା ବାନ୍ଧେ ସେହି ଇସ୍ପିତଙ୍କ ପାଇଁ | “ମୁଁ ନିଜେ ନାଉରୀ/ ଚାଲୁଛି… ଚାଲିବି/ ଯଦି ପଡିଯାଏ କେବେ ଥକି/ ତେମେ ମତେ ଆସିବକି/ଥରେ ଦେଖି” (ଘର)| ସେ ନ ଆସିବାର
ଦୁଃଖରେ ରଙ୍ଗ ବି କ’ଣ ବାସି ପାଲଟି ଯାଏ, ଅନ୍ତର ଅନ୍ତର ଭିତରେ ମନନ୍ତ୍ଵର ଦୂରତା ବଢିଯାଏ, କ୍ରମଶଃ କିମ୍ବଦନ୍ତୀ ପାଲଟି ଯାଉଥାଏ କ’ଣ ତୁମ ଆସିବାର କାହାଣୀ, ଶ୍ରାବଣ
ବି କ’ଣ ଚିଠି ନେଇ ବାଟ ଭାଙ୍ଗି ଚାଲିଯାଏ? କବୟିତ୍ରୀଙ୍କ ଭାଷାରେ “ଶ୍ରାବଣ ହାତରେ ଦେଇଥିଲି ଚିଠି/ ତମେ ଆସିବ ବୋଲି/ ବରଷା ସାଥିରେ ଭିଜି ଭିଜି/ କେତେ ମୁଁ ଚାହିଁଲି/
ତମେ ଆସିଲ ନାହିଁ”| କବିତା ସାରା ପ୍ରତୀକ୍ଷା, ବ୍ୟାକୁଳତା ଆଉ ଲୋଡିବାପଣ | ସଂକଳନରେ ସ୍ଥାନ ପାଇଛି ତିରିଶଟି କବିତା |

ଜଳଜ୍ୟୋତ୍ସ୍ନାର ମାୟା

ଲେଖିକା : ସୌଦାମିନୀ ନନ୍ଦ, ପ୍ରକାଶକ : କଟକ ଷ୍ଟୁଡେଣ୍ଟସ୍ ଷ୍ଟୋର, ବାଲୁବଜାର,
କଟକ, ମୂଲ୍ୟ : ୧୫୦ଟଙ୍କା, ପୃଷ୍ଟା: ୨୧୬
“ମାରୀଚର ମୃତ୍ୟୁ ଅଛି | ମାୟାର ଉଚ୍ଛେଦ ଅଛି | ମାତ୍ର ସୁନାର ହରିଣତୀ ଧାରା ଦେଇନାହିଁ | ସୁନାର ହରିଣ ପାଇଁ ମଣିଷ ମନର ଆକର୍ଷଣରେ ଶେଷ ଆସି ନାହିଁ ” (ସୁନାର
ହରିଣ ) | ସତରେ ଏବେ ବି ମଣିଷ ଦୌଡେ ସୁନାର ହରିଣ ପଛରେ | ଏହି ସଂକଳନଟିରେ ମଣିଷର ଅନ୍ଵେଷାକୁ ଲେଖିକା ଯେତିକି ପରଖିଛନ୍ତି ସେତିକି ସଚେତନ ଅଛନ୍ତି ବାସ୍ତବତା ପ୍ରତି |
ସେ ଶ୍ରୀରାମ ହୁଅନ୍ତୁ ଅବା ଗୌତମ, ଲେଖିକା ପ୍ରତ୍ୟେକ ଚରିତ୍ରର ଅନ୍ତରକୁ ଖୋଜିଛନ୍ତି | ଅନ୍ତର୍ଦ୍ଧାହର ଅନେକ ଦୃଶ୍ୟକୁ ସଂଯୋଜିତ କରିଛନ୍ତି | ଏହି ସଂକଳନରେ ସ୍ଥାପନ
ପାଇଥିବା ଲେଖା ଗୁଡିକରେ ପାଠକେ ଗଳ୍ପ, ରମ୍ୟରଚନା ତଥା ଲଳିତ ନିବନ୍ଧର ମିଶ୍ରିତ ସ୍ପର୍ଶ ପାଇବେ | କାବ୍ୟିକ ଊଚ୍ଛ୍ଵାସ ମଧ୍ୟ ଭରି ରହିଛି ଲେଖା ଗୁଡିକରେ | ଶବ୍ଦ
ଭିତରେ ଜୀବନ ଦର୍ଶନର ଛିଟା ପାଠକଙ୍କୁ ମୁଗ୍ଧ କରିବ | ସଂଚଳନଟିରେ ରହିଛି ତେଇସିଟି ମନୋଜ୍ଞ ଲଳିତ ନିବନ୍ଧ |

ନୂଆ ବହି: ଛାଇ ପଛେ ପଛେ

କବି: ସଂଗ୍ରାମ ଜେନା, ପ୍ରକାଶକ: ଟାଇମପାସ୍, ବରମୁଣ୍ଡା, ଭୁବନେଶ୍ଵର, ମୂଲ୍ୟ: ୬୦
ଟଙ୍କା, ପୃଷ୍ଠା: ୯୬
ପ୍ରତ୍ୟେକ ଥର ସ୍ଵପ୍ନ ଭାଙ୍ଗିଯିବା ପରି ଜୀବନ କଡା ଲେଉଟାଉ ଥାଏ | ପୁଣି ଅନେକ କିଛି ଘଟି ଯାଏ ସ୍ଵପ୍ନପରି | ଏସବୁର କାରଣ ଖୋଜୁଥାଏ ସାଧାରଣ ମଣିଷଟିଏ | କେବଳ କାରଣ ଖୋଜେ
ନାହିଁ, ଜୀବନ ବି ଜିଉଁଥାଏ | “ପୁଣି ସକାଳ ହେଲେ/ ଝରକା ଖୋଲେ, ଆଲୁଅ ଆସେ/ ଆଗଭଳି ଫୁଲ ଥାଏ, କୁଣ୍ଡ ଥାଏ/ ରହିଥାଏ ଘରଦ୍ଵାର ସ୍ଵାମୀ ଓ ସଂସାର/ ଓ ଅଭ୍ୟସ୍ତ ଜୀବନ ତମର”
(ଫୁଲକୁଣ୍ଡରେ ସକାଳ)| ଜୀବନରେ ବି ଝଟ୍କା ଥାଏ | ସୁଖ ଦୁଃଖର ଅନେକ ଦୃଶ୍ୟକୁ କବି ସାଉଁଟି ନିଅନ୍ତି କେବେ କଳ୍ପନାରୁ ତ କେବେ ବାସ୍ତବତାରୁ | ‘କାଶୀପୁରର ଜହ୍ନ’କବିତାରେ ବିସ୍ଥାପନର ଜୀବନକୁ ନେଇ ସୁମତୀ ଭିତରେ ଥିବା ପ୍ରଶ୍ନକୁ କବି ଉତ୍ଥାପିତ କରିଛନ୍ତି “ସେଇ ନୂଆ ଗାଁକୁ କ’ଣ / ଏଇ ମହୁଲ ଗଛ, ଏଇ ପଥର, ଏଇ ଜହ୍ନ/ଏମାନେ ସବୁ ଯିବେ!” | ସଂଗ୍ରାମଙ୍କ ଅନେକ କବିତାରେ ବିମ୍ବର ବିସ୍ମୟ ସ୍ପର୍ଶ ରହିଛି | ଚିତ୍ରକଳ୍ପରେ ଚିତ୍ରିତ ହୋଇଛି ତାଙ୍କ କବିତାର କାୟାକଳ୍ପ, “ଯେମିତି ଜହ୍ନ ଛୁଇଁଲେ/ ଆକାଶ ବଦଳୁଥାଏ/ପୁଣି ସେ ଛୁଇଁବା ସବୁଦିନେ ଅଲଗା ଅଲଗା/ ଓଠକୁ ଛୁଇଁଲେ
ଦ୍ଵିତୀୟା/ ଛାତିକୁ ଛୁଇଁଲେ ପୁର୍ଣିମା” | ଏ ଶବ୍ଦର ସମ୍ମୋହନ ଆଉ ଅନୁଭବର ଅନ୍ତରଙ୍ଗପଣ ସଂକଳନର ଶେଷ କବିତା ଯାଏଁ ଲମ୍ବିଛି | “ତମେ ନିଶ୍ଚେ ସେଦିନ ଆସିବ/ ଯେଉଁଦିନ ମୋ ଅବଶିଷ୍ଠ ଜୀବନ/ ଛାଇଟିଏ ହୋଇ / ତମ ଦେହଯାଏ ଲମ୍ବି ଯାଇଥିବ” (ତମ ଅପେକ୍ଷାରେ)| ସଂକଳନତିରେ ରହିଛି ପଚାଶରୁ ଊର୍ଦ୍ଧ୍ଵ କବିତା |

ପୁସ୍ତକ: ଓଡିଶା ଶିଶୁ ସାହିତ୍ୟର ସୃଜନ ବଳୟରେ କବି ନନ୍ଦକିଶୋର ବଳ

ଲେଖିକା:ପ୍ରବୀଣା ପରିଡା
ପ୍ରକାଶକ:ସୁବର୍ଣଶ୍ରୀ ପ୍ରକାଶିନୀ ଶ୍ରୀକଣ୍ଠପୁର,ବାଲେଶ୍ଵର
ଓଡିଆ ଶିଶୁସାହିତ୍ୟ ପ୍ରତି କବି ନନ୍ଦକିଶୋର ବଳଙ୍କ ଅବଦାନ ଅତୁଳନୀୟ ତାଙ୍କର ସୃଷ୍ଟିରେ ପ୍ରକୃତି ଯେପରି ଜୀବନ୍ତ ମନେହୁଏ,ଗାଁ ଟିଏ ସେପରି ଆକର୍ଷିତ କରେ ପାଠକଙ୍କୁ |ପଲ୍ଲୀର ଶବ୍ଦଚିତ୍ର ଅଙ୍କିବାରେ ନନ୍ଦକିଶୋରଙ୍କ ଚମତ୍କାରିତା ତାଙ୍କୁ ପଲ୍ଲିକବି ଭାବେ ପରିଚିତ କରାଇଛି| “ଡାମରା କଉରେ ଡାମରା କାଉ/ଉଚ୍ଚପରବତେ ବୋବାଉଥାଉ/ଉଚପରବତ କୁଞ୍ଚିକୁଞ୍ଚିକା /ତହିଁରେ ବସିଛି ତିନିମଞ୍ଜିକା”ପରି ତାଙ୍କର ଅନେକ କବିତା ଅନେକଙ୍କର ମୁଖସ୍ଥ ହୋଇରହିଛି |ଲେଖିକାଙ୍କ ଭାଷାରେ,ଶିଶୁମାନଙ୍କ ମାଧ୍ୟମରେ ସେ ନିଜ ଅନ୍ତରର ବାଣିକୁବ୍ୟକ୍ତ କରିବାକୁ ପ୍ରୟାସ କରିଛନ୍ତି|ସ୍ମୃତି,ଅନୁଭୂତି,ମନସ୍ଥାତ୍ୟୁକତା,ପଲ୍ଲୀପ୍ରାଣତା,ଶିଶୁଶୁଲଭତା ସର୍ବୋପରି ବିଭୁପ୍ରାଣତାର ସ୍ପର୍ଶରେ କବିଙ୍କର ରଚନାଗୁଡିକରେ କାଳଜୟୀ ଗୌରବ ଲାଭ କରିଛି |ଏହିପୁସ୍ତକଟିର ପଞ୍ଚୋଟିଅଧ୍ୟାୟରେ ଶିସୁସାହିତ୍ୟର ସଙ୍ଗୟା ସ୍ଵରୂପ ଓ ବିକାଶଧାରା ,ନନ୍ଦକିଶୋରଙ୍କ ଜୀବନୀ ଓ ରଚନାବଳି,ନନ୍ଦକିଶୋରଙ୍କରଚିତ ଶିଶୁସାହିତ୍ୟର ବୈଶିଷ୍ଟ୍ୟ,ପାରବର୍ତୀ ଶିଶୁସାହିତିକଙ୍କ ଉପରେ ନନ୍ଦକିଶୋରଙ୍କ ପ୍ରଭାବ,ଶିଶୁସାହିତିକ ଭାବେ କବି ନନ୍ଦକିଶୋରବଳଙ୍କର ଓଡିଆସାହିତ୍ୟରେ ସ୍ତାନନିରୂପନକରି ପ୍ରସଙ୍ଗ ଗୁଡିକ ଉପରେ ଲେଖିକା ଆଲୋଚନା କରିଛନ୍ତି|ଭାଷାସାହିତ୍ୟର ପାଠକ ଏବଂ ଗବେଷକଙ୍କ ପାଇଁପୁସ୍ତକଟି ଗ୍ରହଣଯୋଗ୍ୟ ମନେହୁଏ|

ପୁସ୍ତକ-“ଅନ୍ତର୍ଯ୍ୟାମୀ ଶ୍ରୀ ଜଗନ୍ନାଥ”

 

ସମ୍ପାଦନା-ପୀତବାସ ରାଉତରାୟ

ପ୍ରକାଶକ-ମହାବୀର ପ୍ରକାଶନ, ଭୁବନେଶ୍ଵର

ପ୍ରଥମ ପ୍ରକାଶ-୨୦୧୨

ମୂଲ୍ୟ-୧୫୦ ଟଙ୍କା

 

ବାହୁଡ଼ା ଅବସରରେ ରଥ ଉପରେ ସମର୍ପଣ କରାଯାଇଛି “ଅନ୍ତର୍ଯ୍ୟାମୀ ଶ୍ରୀ ଜଗନ୍ନାଥ” ପୁସ୍ତକ। ଏଥିରେ ବିଭିନ୍ନ ବିଭାଗରେ ବିଶିଷ୍ଟ ସାହିତ୍ୟିକଙ୍କ ଦ୍ୱାରା ଲିଖିତ ଶ୍ରୀ ଜଗନ୍ନାଥ ତତ୍ତ୍ଵ/କଥା ଆଧାରରେ ଲେଖା ପ୍ରକାଶ କରାଯାଇଛି। ଏଥିରେ ରହିଛି ଅନୁଭବ ଓ ଅନୁଭୂତିର କଥା, ପ୍ରବନ୍ଧ, କବିତା, ସାକ୍ଷାତକାର ସମ୍ବଳିତ ଲେଖା। ଆଶା ଜଗନ୍ନାଥ ପ୍ରେମୀ ଏହାକୁ ଉଦାର ଚିତ୍ତରେ ଗ୍ରହଣ କରିବେ।

ପୁସ୍ତକ- “ଅଡୁଆ ମନ ଅଛିଣ୍ଡା କଥା”

ଗାଳ୍ପିକା/ପ୍ରକାଶିକା-ଚନ୍ଦ୍ରମଣି ବେହୁରା

ଖାରବେଳ ନଗର, ଭୁବନେଶ୍ଵର

ପ୍ରଥମ ପ୍ରକାଶ-୨୦୧୨

ମୂଲ୍ୟ-୧୦୦ ଟଙ୍କା

ମୋଟ ୧୪ଟି ଗଳ୍ପକୁ ନେଇ ଏହି ସଂକଳନ। ସବୁ ଗଳ୍ପର ମୁଖ୍ୟ ଚରିତ୍ର ନାରୀ। ଲେଖିକା ନାରୀର ବାସ୍ତବ ଚିତ୍ରକୁ ତୋଳିଧରିବାକୁ ଚେଷ୍ଟା କରିଛନ୍ତି। ସଂସାର ଭିତରେ ନାରୀ ସାମ୍ନା କରୁଥିବା ଉତଥାନପତନ, ମାତୃତ୍ଵ ଭିତରେ ନାରୀ ଜୀବନର ମହନୀୟତା, ପତ୍ନୀତ୍ଵର ବିଡ଼ମ୍ବନା ଓ ମାଆର ମମତାକୁ ସୁନ୍ଦର ଭାବେ ବର୍ଣନା କରିଛନ୍ତି ଗାଳ୍ପିକା।