ମାର୍ଚ୍ଚ ପ୍ରଥମ ସପ୍ତାହରୁ +୨ ପରୀକ୍ଷା

45518
ନୂଆ ଫର୍ମାଟରେ ହେବ ଯୁକ୍ତ ଦୁଇ ପରୀକ୍ଷା । ମାଟ୍ରିକ ପରେ ଯୁକ୍ତ ଦୁଇ କ୍ଷେତ୍ରରେ ଏହିପରି ସଂସ୍କାର ଆରମ୍ଭ ଆରାଯାଇଛି । ଏଥିପାଇଁ ଉଚ୍ଚଶିକ୍ଷା ପରିଷଦ ପକ୍ଷରୁ ସମସ୍ତ ପ୍ରକାର ପ୍ରୟାସ ଆରମ୍ଭ ହୋଇଛି । ତେବେ ପରୀକ୍ଷା ପାଇଁ ଆଉ ମାତ୍ର କିଛିମାସ ବାକି ରହିଥିବାବେଳେ ଛାତ୍ରଛାତ୍ରୀ ମାନେ ବର୍ତ୍ତମାନ ସୁଦ୍ଧା ସାମ୍ପୁଲ ବୁକଲେଟ ନପାଇଥିବା ହେତୁ ସେମାନେ ଆଶଙ୍କା ଭିତରେ ରହିଛନ୍ତି । ତେବେ ଛାତ୍ରଛାତ୍ରୀ ମାନଙ୍କୁ ଏ ସମ୍ପର୍କିତ ବୁକଲେଟ ପ୍ରଦାନ କରିବା ସହିତ ୪ ଟି ଜୋନରେ ଅଧ୍ୟାପକ ଓ ଅଧ୍ୟାପିକା ମାନଙ୍କୁ ଏ ସମ୍ପର୍କରେ ସବିଶେଷ ତାଲିମ ପ୍ରଦାନ କରାଯିବ ବୋଲି କାଉନସିଲର ଜଣେ ବରିଷ୍ଠ ଅଧିକାରୀ ପ୍ରକାଶ କରିଛନ୍ତି । ୨୦୧୩ ମସିହାରେ ହୋଇଥିବା ଯୁକ୍ତ ୨ ପରୀକ୍ଷାର ପଦାର୍ଥ ବିଜ୍ଞାନ ଓ ରସାୟନ ବିଜ୍ଞାନର ପ୍ରଶ୍ନପତ୍ର ଲିକ୍ ହୋଇଥିଲା । ଯେଉଁ କାରଣ ହେତୁ ନୂଆ ଫର୍ମାଟରେ ପରୀକ୍ଷା କରିବାକୁ ସ୍ଥିର କରାଯାଇଥିଲା । ଚଳିତ ବର୍ଷ ହେବାକୁ ଥିବା ପରୀକ୍ଷାରେ ୭୦ ପ୍ରତିଶତ ଅବଜେକଟିଭ ଟାଇପର ପ୍ରଶ୍ନ ରହିଥିବାବେଳେ ୩୦ପ୍ରତିଶତ ସବଜେକଟିଭ ଟାଇପର ପ୍ରଶ୍ନ ରହିବ । ଏଥିପାଇଁ ୪ଟି ସେଟର ପ୍ରଶ୍ନପତ୍ର କରାଯିବ । ରୋଲ ନମ୍ବର ଅନୁସାରେ ପ୍ରଶ୍ନପତ୍ର କରାଯିବ । ପ୍ରଶ୍ନ ସମାନ ରହିବ । ତେବେ କ୍ରମିକ ସଂଖ୍ୟାକୁ ବଦଳାଇ ଦିଆଯିବ । ୧ମାର୍କ ପ୍ରଶ୍ନ ବିଶିଷ୍ଟ ଉତ୍ତର ପାଇଁ ସ୍ଵତନ୍ତ୍ର ସ୍ଥାନର ବ୍ୟବସ୍ଥା ରହିଥିବାବେଳେ ଏଥିରେ କାଉନସିଲ ପେପର ମିଳିବ ନାହିଁ । ତେବେ ନୂଆ ଫର୍ମାଟ୍ ରେ ପରୀକ୍ଷା ହେବ ବୋଲି ଜଣାପଡିବା ଏବଂ ବର୍ତ୍ତମାନ ସୁଦ୍ଧା ସାମ୍ପୁଲ ବୁକଲେଟ ନପାଇବାକୁ ନେଇ ଛାତ୍ରଛାତ୍ରୀ ମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।

Share in top social networks!