ଇଂରାଜୀ ଅନୂଦିତ ପୁସ୍ତକ ‘ଯମରାଜ ନମ୍ବର ୫୦୦୩’ ଉନ୍ମୋଚିତ

DSC07459ଭାରତୀୟ ଜନ ସଞ୍ଚାର ସଂସ୍ଥାନ (ଆଇଆଇଏମ୍ସି)ର ରୌପ୍ୟ ଜୟନ୍ତୀ ଉପଲକ୍ଷେ ଅନୁÂିତ ଲିଖନ କର୍ମଶାଳାରେ
ଆଇଆଇଏମ୍ସିର ଆଞ୍ଚଳିକ ନିଦେ୍ର୍ଧଶକ ଡ. ମୃଣାଳ ଚାଟାର୍ଜୀଙ୍କ ଚର୍ଚ୍ଚିତ ଓଡ଼ିଆ ଉପନ୍ୟାସ ‘ଯମରାଜ ନମ୍ବର ୫୦୦୩’ର ଇଂରାଜୀ
ଅନୂଦିତ ପୁସ୍ତକ ‘ଯମରାଜ ନମ୍ବର ୫୦୦୩’ ଉନ୍ମୋଚିତ ହୋଇଛି । ପୁସ୍ତକ ଉନ୍ମୋଚନ କରିଛନ୍ତି ରାଉରକେଲା ଷ୍ଟିଲ୍ ପ୍ଲାଣ୍ଟର ମୁଖ୍ୟ
ଯୋଗାଯୋଗ ଅଧିକାରୀ ରମେନ୍ଦ୍ର କୁମାର ଓ କୋଲ୍କାତାସ୍ଥିତ ଭାରତୀୟ ବିଦ୍ୟାଭବନର ଅଧ୍ୟକ୍ଷ ତଥା ହିନ୍ଦୁସ୍ଥାନ ପେପର୍ର
ପୂର୍ବତନ ଡେପୁଟି ଜେନେରାଲ୍ ମ୍ୟାନେଜର ସୁବୀର ଘୋଷ । ଏହାର ଅନୁବାଦ କରିଛନ୍ତି ଅଭିଜ୍ଞ ସାମ୍ବାଦିକ ଥିରୁମୟ ବାନାର୍ଜୀ ।
ସ୍ୱର୍ଗରେ ଗୋଟିଏ ଯମରାଜ ନାହାନ୍ତି । ଏକାଭଳି ଦେଖାଯାଉଥିବା ହଜାର ହଜାର ଯମରାଜ ଅଛନ୍ତି । ଏହା କ୍ଲୋନିଂ ଦ୍ୱାରା
ସମ୍ଭବ ହୋଇଛି । ଏମିତି କ୍ଲୋନିଂ କରାଯାଉଥିବାବେଳେ ଗୋଟିଏ ଯମରାଜର ମ୍ୟାନୁଫ୍ୟାକ୍ଚରିଂ ଡିଫେକ୍ଟ ହୋଇଯାଏ । ତା
ହୃଦୟରେ ସମ୍ବେଦନଶୀଳତା ସୃଷ୍ଟି ହୁଏ । ସେ ମଣିଷର ସୁକୁମାର ଅନୁଭୂତି ଗୁଡ଼ିକ ପ୍ରତି ସମ୍ବେଦନଶୀଳ ହୋଇପଡେ଼ । ତେଣୁ କମ୍
ବୟସରେ ଆତ୍ମହତ୍ୟା କରିଥିବା ଜଣେ ଝିଅର ପ୍ରେମିକ ଯେତେବେଳେ ତାଙ୍କୁ ପ୍ରେମିକାର ଜୀବନ ଦାନ ପାଇଁ ଆକୁଳ ଆବେଦନ
କରେ, ସେ ତାକୁ ଜୀବନଦାନ ଦେଇଦିଏ । ଏ ଘଟଣାକୁ ନେଇ ସ୍ୱର୍ଗରେ ତୁମୁଳ ଆଲୋଡ଼ନ ସୃଷ୍ଟି ହୁଏ । ସ୍ୱର୍ଗର ଶକ୍ତି ବିନ୍ୟାସ
ଦୋହଲିଯାଏ । ସ୍ୱର୍ଗରେ ଶୃଙ୍ଖଳା ରଖିବା ପାଇଁ ବ୍ରହ୍ମା, ବିଷ୍ଣୁ ଓ ମହେଶ୍ୱର ଯମରାଜକୁ ଭଷ୍ମ କରିଦେବା ପାଇଁ ସ୍ଥିର କରିଦିଅନ୍ତି ।
ମୋଟାମୋଟି ଏହା ହେଉଛି ‘ଯମରାଜ ନମ୍ବର ୫୦୦୩’ର କାହାଣୀ । ଏଥିରେ ଲେଖକ ଶକ୍ତି ବିନ୍ୟାସର ବିଭିନ୍ନ ସ୍ତର ଓ
ପ୍ରକ୍ରିୟାକୁ ବିଶ୍ଳେଷଣ କରିବାକୁ ଚେଷ୍ଟା କରିଛନ୍ତି । ହାସ୍ୟ ରସ, ବ୍ୟଙ୍ଗ ସହିତ କରୁଣ ରସର ମିଶ୍ରଣ ଏହାକୁ ଏକ ଅନବଦ୍ୟ
ଉପନ୍ୟାସ କରିତୋଳିଛି ।
ବହିଟି ପୂର୍ବରୁ ଅସମୀୟା ଭାଷାରେ ମୃଣାଳ କୁମାର ନାଥଙ୍କ ଦ୍ୱାରା ଅନୁବାଦ ହୋଇ ୨୦୧୬ ମସିହାରେ ଉନ୍ମୋଚନ
ହୋଇଥିଲା । ଏହାର ଚାହିଦାକୁ ଆଖି ଆଗରେ ରଖି ଇଂରାଜୀ ଅନୁବାଦ କରିଛନ୍ତି ଅଭିଜ୍ଞ ସାମ୍ବାଦିକ ଥିରୁମୟ ବାନାର୍ଜୀ । ଏହାକୁ
ନୂଆଦିଲ୍ଲୀର ରୁପା ପବ୍ଲିକେଶନ୍ ପ୍ରକାଶିତ କରିଛି ।
ଓଡ଼ିଆ ବ୍ୟଙ୍ଗ ସାହିତ୍ୟ କ୍ଷେତ୍ରରେ ପ୍ରଫେସର ଡ. ମୃଣାଳ ଚାଟାର୍ଜୀ ଜଣେ ପରିଚିତ ବ୍ୟକ୍ତିତ୍ୱ । ୨୦୧୦ ମସିହାରେ ତାଙ୍କ
ଦ୍ୱାରା ଲିଖିତ ପୁସ୍ତକ ‘ଜଗତେ ଥିବା ଯେତେଦିନ’ ବେଶ୍ ଆଦୃତି ଲାଭ କରିଥିଲା । ଏହି ପୁସ୍ତକଟି ଦୈନିକ ‘ସମାଜ’ରେ ନିୟମିତ
ପ୍ରକାଶିତ ସ୍ତମ୍ଭର ସଙ୍କଳନ । ପୂର୍ବରୁ ସେ ପୁସ୍ତକ ‘ନିଆଁ’, ‘କଣ୍ଢେଇ’, ‘ଯମରାଜ ଛୁଟିରେ’, ‘ଏକ ସୁନ୍ଦର ଚାନ୍ଦିନୀ ରାତିରେ’ ଭଳି
ଅନେକ ଉପନ୍ୟାସ ଲେଖି ଓଡ଼ିଆ ସାହିତ୍ୟ ଭଣ୍ଡାରକୁ ସମୃଦ୍ଧ କରିଛନ୍ତି ।