ଦୂରଗାମୀ ସବସୋନିକ କ୍ରୁଜ କ୍ଷେପଣାସ୍ତ୍ର ‘ନିର୍ଭୟ’ର ସଫଳ ପରୀକ୍ଷଣ

ପ୍ରତିରକ୍ଷା ଗବେଷଣା ଓ ଉନ୍ନୟନ ପ୍ରତିଷ୍ଠାନ(ଡିଆରଡିଓ) ଆଜି ଆଉ ଏକ ସଫଳତା ହାସଲ କରିଛି । ଭାରତର ପ୍ରଥମ ସ୍ୱଦେଶୀ କୌଶଳରେ ନିର୍ମିତ ଓ ବିକଶିତ ଦ୍ରୂତ ଓ ଦୂରଗାମୀ ସବସୋନିକ କ୍ରୁଜ କ୍ଷେପଣାସ୍ତ୍ର-‘ନିର୍ଭୟ’କୁ ସଫଳତାର ସହ ପରୀକ୍ଷଣ କରିଛି । ଏହାକୁ ବିବିଧ ଭିତ୍ତିଭୂମିରୁ ଉତକ୍ଷେପଣ କରାଯାଇ ପାରିବ । ଏହି କ୍ଷେପଣାସ୍ତ୍ରକୁ ଓଡିଶାର ଚାନ୍ଦିପୁର ସ୍ଥିତ ସମନ୍ୱିତ ପରୀକ୍ଷଣ କେନ୍ଦ୍ର(ଆଇଟିଆର)ରୁ ସଫଳତାର ସହ ପରୀକ୍ଷଣ କରାଯାଇଛି । 100 ମିଟର ଦ୍ରାଘିମାରୁ କମ ଏବଂ 00.7 ମାକରେ ଏହି କ୍ଷେପଣାସ୍ତ୍ର ଗତି କରିପାରିବ । ମୂଳରୁ ଶେଷ ପର୍ଯ୍ୟନ୍ତ ସମସ୍ତ ଲକ୍ଷ୍ୟ ଏବଂ ଉଦ୍ଦେଶ୍ୟକୁ ଏହି ପରୀକ୍ଷଣ ମାଧ୍ୟମରେ ପୂରଣ କରାଯାଇ ପାରିଛି ଏବଂ ଏହାଫଳରେ ଏଥିସହିତ ସଂପୃକ୍ତ ସମସ୍ତ ବୈଜ୍ଞାନିକଙ୍କ ଆତ୍ମବିଶ୍ୱାସ ବୃଦ୍ଧି ପାଇଛି ।

ଆବଶ୍ୟକ କାର୍ଯ୍ୟଧାରା ଅନୁସାରେ ସମସ୍ତ ଜଟିଳ ପ୍ରକ୍ରିୟା ଯଥା ଲଞ୍ଚ ଫେଜ, ବୁଷ୍ଟର ଡ଼ିପ୍ଲୋଏମେଣ୍ଟ, ଇଞ୍ଜିନ ଷ୍ଟାର୍ଟ, ୱିଙ୍ଗ ଡିପ୍ଲୋଏମେଣ୍ଟ ଏବଂ ଅନ୍ୟାନ୍ୟ ପରିଚାଳନାଗତ ବ୍ୟବସ୍ଥା ମାଧ୍ୟମରେ ସ୍ୱୟଂଚାଳିତ ପଦ୍ଧତିରେ ଏହି କ୍ଷେପଣାସ୍ତ୍ରର ପରିଚାଳନା କରାଯାଇଥିଲା । ଏହି କ୍ଷେପଣାସ୍ତ୍ରକୁ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ରିଙ୍ଗ ଲେଜର ଗାଇରୋସ୍କୋପ (ଆରଏଲଜି), ଏମଇଏମଏସ ଆଧାରିତ ଇନର୍ସିଆଲ ନାଭିଗେସନାଲ ସିଷ୍ଟମ (ଆଇଏନଏସ) ଏବଂ ଜିପିଏସ ପଦ୍ଧତି ମାଧ୍ୟମରେ ନିର୍ମାଣ କରାଯାଇଛି । ଗ୍ରାଉଣ୍ଡ ଆଧାରିତ ରାଡାର ମାଧ୍ୟମରେ କ୍ଷେପଣାସ୍ତ୍ରକୁ ଟ୍ରାକ କରାଯାଉଛି ଏବଂ ଏହାର ଅନ୍ୟାନ୍ୟ ବ୍ୟବସ୍ଥାକୁ ଡିଆରଡିଓ ଦ୍ୱାରା ପ୍ରସ୍ତୁତ ସ୍ୱଦେଶୀ ଜ୍ଞାନକୌଶଳ ମାଧ୍ୟମରେ ବିକଶିତ ପଦ୍ଧତି ଦ୍ୱାରା ପରିଚାଳିତ କରାଯାଉଛି ।

ପ୍ରତିରକ୍ଷା ମନ୍ତ୍ରୀ ଶ୍ରୀମତି ନିର୍ମଳା ସୀତାରମଣ ଡିଆରଡିଓ ବୈଜ୍ଞାନିକମାନଙ୍କ ସଫଳତାକୁ ପ୍ରଶଂସା କରିବା ସହ ଏଥିନିମନ୍ତେ ସେମାନଙ୍କୁ ଅଭିନନ୍ଦନ ଜଣାଇଛନ୍ତି । ଏହି ସଫଳ ପରୀକ୍ଷଣ ଭାରତକୁ ଜଟିଳ ଜ୍ଞାନକୌଶଳ ବିଶିଷ୍ଟ ସବ-ସୋନିକ କ୍ରୁଜ ମିଶାଇଲ ଥିବା ରାଷ୍ଟ୍ରମାନଙ୍କ ତାଲିକାରେ ସାମିଲ କରିଛି ।

ଡିଆରଡିଓ ଅଧ୍ୟକ୍ଷ ଏବଂ ପ୍ରତିରକ୍ଷା ବିଭାଗ ସଚିବ (ଆର ଆଣ୍ଡ ଡି) ଡଃ ଏସ ଖ୍ରୀଷ୍ଟୋଫର, ଡିଜି (ଏରୋ) ଡଃ ସିପି ରାମନାରାୟଣନ, ଏଡିଇ, ଆରସିଆଇ, ଆଇଟିଆର ଏବଂ ସିଇଏମଆଇଏଲଏସି ନିର୍ଦ୍ଦେଶକ ଏବଂ ଡିଆରଡିଓର ବରିଷ୍ଠ ବୈଜ୍ଞାନିକ ଏବଂ ସେନାର ଅନ୍ୟାନ୍ୟ ପ୍ରତିନିଧି ଏହି ପରୀକ୍ଷଣ ସମୟରେ ଉପସ୍ଥିତ ରହିବା ସହ ଏହି ସଫଳତା ପାଇଁ ଡିଆରଡିଓକୁ ଗର୍ବିତ କରିଥିବା ‘ନିର୍ଭୟ’ ଟିମକୁ ଅଭିନନ୍ଦନ ଜଣାଇଥିଲେ ।

Share in top social networks!
Powered By Indic IME