କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେ.ପି. ନଡ୍ଡା ଓ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବୁଧବାର ଓଡିଶା ଗସ୍ତ

naddda
– ବିଭିନ୍ନ ହସପିଟାଲ ଯାଇ ସମ ହସପିଟାଲ ଅଗ୍ନିକାଣ୍ଡରେ ଆହତଙ୍କ ସ୍ୱାସ୍ଥ୍ୟାବସ୍ଥା ବୁଝିବେ
– କେନ୍ଦ୍ର ଓ ରାଜ୍ୟ ସ୍ୱାସ୍ଥ୍ୟ ଅଧିକାରୀଙ୍କ ବୈଠକରେ ଯୋଗଦେବେ ଶ୍ରୀ ନଡ୍ଡା
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେ.ପି. ନଡ୍ଡା ଓ କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବୁଧବାର ଦିନ ଭୁବନେଶ୍ୱରରେ ପହଂଚିବେ ବୋଲି ବିଜେପି ମୁଖପାତ୍ର ସଜ୍ଜନ ଶର୍ମା ଏକ ପ୍ରେସ ବିବୃତିରେ ଜଣାଇଛନ୍ତି ।
ସେ କହିଛନ୍ତି ଯେ ଦୁଇ କେନ୍ଦ୍ର ମନ୍ତ୍ରୀ ଭୁବନେଶ୍ୱର ବିମାନ ବନ୍ଦରରେ ଦିନ ଦଶଟା ବେଳେ ପହଂଚିବେ । ପରେ ସେମାନେ ମିଳିତ ଭାବେ କ୍ୟାପିଟାଲ ହସପିଟାଲ (ସକାଳ୧୦.୧୦) , ଏମ୍ସ ( ଦିନ ୧୧ଟା) , ଆମ୍ରୀ ହସପିଟାଲ (ଦିନ ୧୧.୪୦) , ସମ ହସପିଟାଲ ( ଦିନ ୧୨.୦୫), କିମ୍ସ ହସପିଟାଲ ( ଦିନ ୧୨.୪୫) ଗସ୍ତ କରିବେ ।
ସୋମବାର ଦିନ ସମ ହସପିଟାଲରେ ଅଗ୍ନିକାଣ୍ଡ ଘଟିବା କାରଣରୁ ଏହି ହସପିଟାଲରୁ ଅନ୍ୟାନ୍ୟ ହସପିଟାଲକୁ ସ୍ଥାନାନ୍ତରିତ ହୋଇଥିବା ରୋଗୀ ମାନଙ୍କର ସ୍ୱାସ୍ଥ୍ୟବସ୍ଥା ତଦାରଖ କରିବା ସହ ରୋଗୀ ସେମାନଙ୍କର ଆଟେଣ୍ଡାଂଟ ତଥା ଚିକିତ୍ସା କରୁଥିବା ଡାକ୍ତର ମାନଙ୍କ ସହ ସିଧା ସିଧା କଥା ହେବେ । ଦୁଇ ମନ୍ତ୍ରୀ ସମ ହସପିଟାଲ ଯାଇ ଦୁର୍ଘଟଣା ସ୍ଥଳ ବୁଲି ଦେଖିବାର କାର୍ଯ୍ୟକ୍ରମ ରହିଛି ବୋଲି ସେ କହିଛନ୍ତି ।
ଅପରାହ୍ନରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେ.ପି. ନଡ୍ଡା କେନ୍ଦ୍ର ଓ ରାଜ୍ୟ ସରକାରଙ୍କର ଅଧିକାରୀ ମାନଙ୍କ ସହ ଏକ ବୈଠକ କରି ସମ ହସପିଟାଲ ଅଗ୍ନିକାଣ୍ଡ ପରବର୍ତୀ ପରିଚାଳନା ସମେତ ଅନ୍ୟାନ୍ୟ ପ୍ରସଙ୍ଗରେ ସମୀକ୍ଷା କରିବା କାର୍ଯ୍ୟକ୍ରମ ରହିଛି ବୋଲି ଶ୍ରୀ ଶର୍ମା କହିଛନ୍ତି ।