ଆଲୋକ ପ୍ରଦୂଷଣର ସହଜ ସମାଧାନ ପ୍ରଦର୍ଶନ କଲେ ଓଡ଼ିଆ ଛାତ୍ରୀ

ରାଜଧାନୀ ଦିଲ୍ଲୀ ସ୍ଥିତ ଭାରତୀୟ ପ୍ରଦ୍ୟୋଗିତ ସଂସ୍ଥାନ(ଆଇଆଇଟି, ଦିଲ୍ଲୀ)ରେ ଆୟୋଜିତ ଇନ୍ସ୍ପାୟର୍ (ଇନୋଭେନସନ୍ ଇନ୍ ସାଇନ୍ସ ପ୍ରସ୍ୟୁଟ୍ ଇନ୍ସ୍ପାୟର୍ଡ ରିସର୍ଟ) ପ୍ରଦର୍ଶନୀରେ ବିଜ୍ଞାନ ବିଭାଗର ଛାତ୍ରୀ କୃତ୍ରିମ ଆଲୋକର ଅପର୍ଯ୍ୟାପ୍ତ ବ୍ୟବହାର ଯୋଗୁଁ ବଢ଼ୁଥିବା ଆଲୋକ ପ୍ରଦ୍ୟୁଷଣ ପ୍ରତି ଲୋକଙ୍କ ଧ୍ୟାନ ଆକର୍ଷଣ କରି ଏହାର ସହଜ ସମଡଧାନ ପନ୍ଥା ଉପସ୍ଥାପନ କରିଛନ୍ତି ।
୫ ଦିନିଆ ଭାରତୀୟ ଅନ୍ତରାଷ୍ଟ୍ରୀୟ ବିଜ୍ଞାନ ମହୋତ୍ସବ ଅବସରରେ ଆୟୋଜିତ ଦୁଇଦିନିଆ ଇନ୍ସ୍ପାୟର୍ ପ୍ରଦର୍ଶନୀରେ ଓଡ଼ିଶା ରାଜଗାଙ୍ଗପୁର କୁଟୁଣିଆ ପଞ୍ଚାୟତ ଉଚ୍ଚ ବିଦ୍ୟାଳୟର ଏକାଦଶ ଶ୍ରେଣୀ ଛାତ୍ରୀ ଇବା ଦାସ ଏହି ପ୍ରକଳ୍ପ ପ୍ରଦର୍ଶନ କରିଥିଲେ ।
ସେ କହନ୍ତି, ବଡ଼ ବଡ଼ କୋଠା, ପାର୍କ ଏବଂ ଶିଳ୍ପ ସଂସ୍ଥାନରେ ଉଚ୍ଚ କ୍ଷମତା ସମ୍ପନ୍ନ ଆଲୋକ ବ୍ୟବହାର କରାଯାଉଛି । ଏହା ଯୋଗୁଁ ଆଲୋକ ପ୍ରଦୂଷଣ ହେବା ସହ ବିଜୁଳି ଶକ୍ତି ଅନାବଶ୍ୟକ ଭାବେ ବ୍ୟବହୃତ ହେଉଛି । ଇବା ଦାସଙ୍କ ପ୍ରସ୍ତାବ ରହିଛି, ଶିଳ୍ପ ସଂସ୍ଥା ପରିସରର ଚାରିପାଖେ ଯଦି ଗୋଟିଏ ଗୋଟିଏ ପ୍ରତିବିମ୍ବକ ବ୍ୟବହାର କରାଯାଏ ଏବଂ ଏହା ଉପରେ ଏଲ୍ଇଡି ବ୍ଲବର ଆଲୋକ ପ୍ରତିବିମ୍ବିତ କରାଯାଏ ତେବେ ଏହା କମ ବିଦ୍ୟୁତ ଶକ୍ତି ଓ ଆଲୋକ ପ୍ରକାଶାନରେ ଅଧିକ ଅଞ୍ଚଳ ଆଲୋକିତ କରିବାରେ ସମର୍ଥ ହେବ । ଏହା ଆଲୋକ ପ୍ରଦୂଷର ବହୁଗୁଣରେ କମ କରିବ ବୋଲି ତାଙ୍କର ମତ ।
ସେ କହନ୍ତି, ଆଜିକାଲି ଅଧିକାଂଶ ସ୍ଥାନରେ ଆବଶ୍ୟକତା ଠାରୁ ଅଧିକ ଆଲୋକ ବ୍ୟବହାର ହେଉଛି । ଏହା ହିଁ ଆଲୋକ ପ୍ରଦୂଷଣର ପ୍ରମୁଖ କାରଣ । କେବଳ ପରିବେଶ ଉପରେ ନୁହେଁ, ଏହା ମଣିଷ ଓ ଜୀବଜନ୍ତୁଙ୍କ ଉପରେ ମଧ୍ୟ କୁପ୍ରଭାବ ପକାଉଛି । ଆଲୋକ ପ୍ରଦୂଷଣ ଯୋଗୁଁ ମଣିଷର ଦୃଷ୍ଟିଶକ୍ତି ହ୍ରାସ ପାଇବା ସହ ଚିଡ଼ିଛିଡ଼ା ପଣ, ଆଖିରେ ଅଶ୍ୱସ୍ତି ଅନୁଭବ, ହର୍ମୋନ୍ ଅସନ୍ତୁଳନ ଓ ମସ୍ତିଷ୍କ ତଥା କୋଷର ପ୍ରତିରୋଧକ ଶକ୍ତି ହ୍ରାସ କରିଥାଏ ।
ଇନ୍ସ୍ପାୟର ପ୍ରଦର୍ଶନୀରେ ଅନ୍ୟ ଜଣେ ଛାତ୍ର ଗୋଡ଼ରେ ଚାଲୁଥିବା ୱାସିଂ ମେସିନ୍ ପ୍ରଦର୍ଶନ କରିଥିଲେ । ଏହି ଯନ୍ତ୍ର ପୁରୁଣା ସାଇକଲ, ପ୍ଲାଷ୍ଟିକ୍ ଡ୍ରମ୍, ଦୁଇଟି ଥାଳି ଓ ଲୁହାର ଜାଲିରେ ପ୍ରସ୍ତୁତ । ଏହି ଯନ୍ତ୍ର ବ୍ୟବହାର ଦ୍ୱାରା କେବଳ ବିଜୁଳି ଶକ୍ତି ସଂଚୟ ହୁଏ ତାହା ନୁହେଁ, ବରଂ ମଣିଷର ବ୍ୟାୟାମ ବି ହୋଇଥାଏ । ମଧ୍ୟପ୍ରଦେଶ ଛିଣ୍ଡୱାଡ଼ାର ଲାଲବାହାଦୂର ଶାସ୍ତ୍ରୀ ମାଧ୍ୟମିକ ବିଦ୍ୟାଳୟର ସପ୍ତମ ଛାତ୍ର ଦର୍ଶନ ସଂଜୟ କୋହଲି ଏହି ୱାସିଂ ମେସିନ୍ ପ୍ରଦର୍ଶନ କରିଥିଲେ ।
ମଧ୍ୟପ୍ରଦେଶ ଗ୍ୱାଲିୟରର ଅମ୍ବଲ ସ୍ଥିତ ସରକାରୀ ଉଚ୍ଚ ବିଦ୍ୟାଳୟ ଦଶମ ଶ୍ରେଣୀ ଛାତ୍ର ରାଜପାଳ ସିଂ ରାୱତ ସୂର୍ଯ୍ୟ କିରଣ ଆଧାରିତ ‘ସୋଲାର ପାୱାର ଫ୍ରିଜ୍’ ପ୍ରକଳ୍ପ ପ୍ରଦର୍ଶନ କରିଥିଲେ । ଏହା ସାହାଯ୍ୟରେ ଗାଁର ଚାଷୀମାନେ କମ ଖର୍ଚରେ ଫଳ ଓ ପନିପରିବା ସୁରକ୍ଷିତ ରଖିପାରିବେ । ଏହି ଫ୍ରିଜ୍ ବାସ୍ପୀକରଣ ପ୍ରକ୍ରିୟାରେ କାର୍ଯ୍ୟ କରେ ।
ଆନ୍ଧ୍ରପ୍ରଦେଶର ଚିତ୍ତୋର ଜିଲ୍ଲା ରେଣିଗୁଣ୍ଟା ବ୍ଲକ ଜେପି ଉଚ୍ଚ ବିଦ୍ୟାଳୟ ଦଶମ ଶ୍ରେଣୀ ଛାତ୍ରୀ ଏମ୍ ଜ୍ୟୋତି ବର୍ଯ୍ୟବସ୍ତୁ ସଫା ଲାଗି ଏଭଳି ପ୍ରଣାଳୀ ଉପଯୋଗ କରିଛନ୍ତି ଯାହା ହମ୍ପ୍ସରେ ଗାଡ଼ି ରଖିବା ବେଳେ ଯେଉଁ ବିଜୁଳି ଶକ୍ତି ଉତ୍ପାଦନ ହୁଏ ସେଥିରେ ଚାଲେ ।
ଇନ୍ସ୍ପାୟର୍ ପ୍ରଦର୍ଶନୀରେ ଦେଶର ୭୫୩ ସ୍କୁଲର ଛାତ୍ରଛାତ୍ରୀ ନିଜର କୌଶଳ ପ୍ରଦର୍ଶନ କରିଛନ୍ତି । ସେମାନଙ୍କର ପ୍ରକଳ୍ପ ସବୁ ଶକ୍ତିସଂରକ୍ଷଣ ଉପରେ ଆଧାରିତ ।
ଏହି ପ୍ରଦର୍ଶନୀର ଆୟୋଜନ ଦେଶର ସବୁଠାରୁ ବଡ଼ ବିଜ୍ଞାନ ଆନ୍ଦୋଳନ ପରିଚାଳନା କରୁଥିବା ସଂସ୍ଥା ବିଜ୍ଞାନଭାରତୀର ସହଯୋଗରେ ବିଜ୍ଞାନ ଓ ପ୍ରୋଦ୍ୟୋଗିକ ତଥା ପୃଥିବୀ ବିଜ୍ଞାନ ମନ୍ତ୍ରାଳୟ ଦ୍ୱାରା ଆଇଆଇଟି ଦିଲ୍ଲୀରେ ଆୟୋଜିତ ହେଉଛି । ପ୍ରଦ୍ୟୋଗିକ ସୂଚନା, ପୂର୍ବାନୁମାନ ଓ ଆକଳନ ପରିଷଦ(ଟିଆଇଇଏଫ୍ଏସି) ଏହି ଆୟୋଜନର ନୋଡାଲ ଏଜେନ୍ସି ରହିଛି ।