ନବନବୋଭାବନଶୀଳ…!!!

10250324_549583295150875_591131999373893045_nସୁଧି ପାଠକେ…!
ଏଇମିତି ସକାଳ ଆସେ । ଆମର ଦୈନନ୍ଦିନ କର୍ତ୍ତବ୍ୟ କର୍ମରେ ଆମେ ପୁଣି ହଜିଯାଉ। ସଞ୍ଜ ନଇଁ ଆସେ। ପୁଣି ଆସନ୍ତାକାଲିର ଚିନ୍ତାରେ ଆମେ ପୁଣି ସୁଷୁପ୍ତି ଅବସ୍ଥାକୁ ଚାଲିଯାଉ। ଜୀବନର ଏଇ କୋଳାହଳରେ ନା ମନୁଷ୍ୟ ଶାନ୍ତିରେ ଶୋଇପାରେ ନା ଜୀବନର ଏଇ ଅବଚେତନ ନିଷ୍ପନ୍ଦତାରେ କେବେ ପ୍ରକୃତ ଜାଗ୍ରତ ହୁଏ । ମନୁଷ୍ୟର ଜୀବନରେ ସମୃଦ୍ଧି ନିମନ୍ତେ ଉଚ୍ଚାଭିଳାଷ ଅତ୍ୟୁତ୍ତମ ହେଲେ ଅତ୍ୟାଶା ତାକୁ ଅତି ଦୟନୀୟ ଅବସ୍ଥାକୁ ପ୍ରେରିତ କରିଥାଏ । ତାର ଭରସା ତାକୁ ଆଶଂସିତ କରେ। ହେଲେ ବିଫଳତାରେ ତାର ଗତିଜ୍ଞାନ ସବୁ ଲୋପହୁଏ। ମନୁଷ୍ୟର ଦିବ୍ୟାଶା ଆଉ ବାସ୍ତବବାଦର ସ୍ୱପ୍ନ ହିଁ ତାକୁ ଏକ ଶ୍ରେଷ୍ଠଜୀବ କରି ଗଢ଼ି ତୋଳେ। ଜୀବନଯାପନର ଗତିପଥ ସମାଜର ମାପକରେ ବହୁକାଳରୁ ନିର୍ଦ୍ଧାରିତ ହୋଇଆସିଛି।

କେତେଜଣ ଏଇ ଚିରାଚରିତ ଗତିପଥକୁ ଆପଣେଇ ପାରନ୍ତି ନାହିଁ। ସମାଜରେ ବିଦ୍ରୋହ ଉଠେ। ସଂସ୍କାର ଚିହିଁକି ପଡ଼େ। ଇତିହାସ ବହି ପୁଣି ପଛକୁ ଲେଉଟେ। ବିବର୍ତ୍ତନବାଦର ସୂତ୍ରପାତ ହୁଏ। ସେଇଥିରୁ ଉତୁରି ଆସନ୍ତି ବୁଦ୍ଧ, ଯୀଶୁ, ସକ୍ରେଟିସ୍‌, ହିଟ୍‌ଲର୍‌, ମହାତ୍ମା, ସଦ୍ଦାମ୍‌, ଓସାମା, ଟେରେସା, ପ୍ରଭୃତି। ସମାଜର ନିର୍ଦ୍ଧାରିତ ପଥରୁ କେବଳ ନିଜକୁ ନୁହଁ ସମଗ୍ର ମାନବଜାତିକୁ କୋଳେଇ ନେବାର ଭାବନାରେ ଯେଉଁମାନେ ଅଡ଼େଇ ଯାଆନ୍ତି ସେମାନେ ଦିବ୍ୟାତ୍ମା ହୋଇଯାଆନ୍ତି। ଯେଉଁମାନେ ଏଇ ନିର୍ଦ୍ଧାରିତ ପଥକୁ ଠେଲିଦେଇ ନିଜକୁ ଶ୍ରେଷ୍ଠ ଆଉ ଶକ୍ତିମାନ ରୂପେ ପ୍ରତିଷ୍ଠା କରନ୍ତି ସେମାନେ ସଇତାନ ହୁଅନ୍ତି।

ସାଂଖ୍ୟ ଦର୍ଶନରେ ଅବ୍ୟାକୃତ ପ୍ରସଙ୍ଗରେ ଆଦିରସରୁ ସମଗ୍ର ବିଶ୍ୱର ଅଭ୍ୟୁଦୟର କଥା ଅତି ଜ୍ଞାନୋପଯୋଗୀ। ସମଗ୍ର ସୃଷ୍ଟି ଆଧିଭୌତିକ। ସମଗ୍ର ଜୀବ ପଞ୍ଚ ମହାଭୂତରୁ ସୃଷ୍ଟି ହୋଇ ସେଇଥିରେ ହିଁ ବିଲୟ ହୁଅନ୍ତି। ବିଲୟର ପୂର୍ବକ୍ଷଣରେ ଦେଇଯାଆନ୍ତି ନିଜର ଜ୍ଞାନ ଅଥବା ଅଜ୍ଞାନର ଶକ୍ତି ତରଙ୍ଗ। ଏହାକୁ ଅନୁସରି କିଏ ଚିନ୍ତାଚୈତନ୍ୟର ସହ ପ୍ରେରିତ ହୋଇ ମହାମାର୍ଗରେ ହଜିଯାଏ ଆଉ କିଏ ଏହି ମହାମାର୍ଗର ବିପରୀତାଭିମୁଖୀ ହୁଏ। ଏଇ ଦୁନିଆଁ ମନୁଷ୍ୟର ଆଶା ଓ ନିରାଶାର ଚରାଭୂଇଁ।

ମହାଭାରତର ବନପର୍ବ ହେଉ ବା ବିଶ୍ୱର ଯେ କୌଣସି ଧର୍ମଗ୍ରନ୍ଥ ହେଉ; ସବୁଠାରେ କାରଣଜଳ ହିଁ ସୃଷ୍ଟିର ପ୍ରଥମ କାରଣ ହୋଇ ଆସିଛି। ମନୁଷ୍ୟର ଶରୀରଗତ କୋଷ ସମଗ୍ରର ଅର୍ଦ୍ଧାଧିକ ତତ୍ତ୍ବ ମଧ୍ୟ ଜଳ। ମନୁଷ୍ୟର ଜୀବସତ୍ତାକୁ ଜଳର ସମସ୍ତ ଗୁଣାବଳୀ ପ୍ରାପ୍ତ ହୋଇ ଆସିଅଛି। ମନୁଷ୍ୟର ପ୍ରକୃତ ସ୍ଥିତି ହେଉଛି ତାର ଆତ୍ମା ଯାହାକୁ ଅବିନଶ୍ୱର ଆଉ ସମସ୍ତ ଇନ୍ଦ୍ରିୟସତ୍ତାରୁ ବିମୁକ୍ତ। କିନ୍ତୁ ଆମର ଲାଳସା, କାମନା ଆଉ ଅହଂ ଆମର ଶରୀରକୁ ତଥା ସମସ୍ତ ଜୀବତତ୍ତ୍ୱକୁ ବିନଷ୍ଟ କରିଥାଏ। ଏହି ତତ୍ତ୍ୱକୁ ବୁଝିବାକୁ ହେଲେ, ଆସ ବୁଝିବା ମନୁଷ୍ୟ ଶରୀରର ଏକକ ପ୍ରତ୍ୟେକ କୋଷର କଥା। ଏହାର ସର୍ଜ୍ଜନା ଆଉ ବିଲୟର କଥା ।

[କ୍ରମଶଃ]

[ “ନବନବୋଭାବନଶୀଳ” ଏକ ସୁଦୀର୍ଘ ପ୍ରବନ୍ଧ “ଅହଂ ବ୍ରହ୍ମାସ୍ମି”ର କିୟଦଂଶ(ତୃତୀୟ ଅଂଶ) । ଯାନ୍ତ୍ରୀକ ମୁଦ୍ରଣ ସମୟ ସାପେକ୍ଷ ହୋଇଥିବାରୁ ସମ୍ପୂର୍ଣ୍ଣ ପ୍ରବନ୍ଧଟି ପ୍ରକାଶ କରିବାର ସୁଯୋଗ ମିଳୂନାହିଁ । ସହୃଦୟ ପାଠକଗଣ ମୋ ଦ୍ୱିଧାକୁ ହୃଦୟଙ୍ଗମ କରିବେ ବୋଲି ମୋର ଆଶା ଓ ବିଶ୍ୱାସ। ସମୟ ଓ ସୁଯୋଗ ଅନୁସାରେ ପରବର୍ତ୍ତୀ ଭାଗ ସବୁ ମୁଦ୍ରଣ ହେଲେ ନିଶ୍ଚୟ ପାଠକଙ୍କ ନିମନ୍ତେ ପ୍ରକାଶ କରିବି।]

Share in top social networks!