ଅଗଷ୍ଟ କ୍ରାନ୍ତିର ବାର୍ତ୍ତା ଭାରତ ଲାଗି ମହାମନ୍ତ୍ର ; ଅଗଷ୍ଟ ବିପ୍ଳବର ସଂଗ୍ରାମୀମାନଙ୍କୁ ସମ୍ବର୍ଦ୍ଧନା

unnamed
ଆଜି ଥିଲା ଅଗଷ୍ଟ କ୍ରାନ୍ତି ଦିବସ । ୧୯୪୨ ମସିହା ର ଅଗଷ୍ଟ ବିପ୍ଳବକୁ ମନେପକାଇ ରାଜଧାନୀ ଭୁବନେଶ୍ଵରରେ ଏକାଠି ହୋଇଥିଲେ ଅନେକ ବୟୋଜ୍ୟେଷ୍ଠ ସ୍ଵାଧୀନତା ସଂଗ୍ରାମୀ । ଅତୀତର ସ୍ମୃତି ରୋମନ୍ଥନ କଲେ ଓ ବର୍ତ୍ତମାନ ର ଭାରତକୁ ନେଇ ମଧ୍ୟ ଚିନ୍ତା ପ୍ରକଟ କଲେ । ବାର୍ତ୍ତା ଥିଲା ଗାନ୍ଧୀବାଦର ପ୍ରାସଙ୍ଗିକତା ଆଜିର ଭାରତରେ ବଡ ଆବଶ୍ୟକତା ସୃଷ୍ଟି କରିଛି । ଅଗଷ୍ଟ କ୍ରାନ୍ତିର ବାର୍ତ୍ତା ଭାରତ ଲାଗି ଆଜି ବି ମହାମନ୍ତ୍ର ହୋଇଛି । ସ୍ଵାଧୀନତା ସଂଗ୍ରାମୀ ସ୍ମାରକୀ ଫାଉଣ୍ଡେସନ ପକ୍ଷରୁ ଅଗଷ୍ଟ କ୍ରାନ୍ତି ଦିବସ ଅବସରରେ ‘ଅଗଷ୍ଟ କ୍ରାନ୍ତି ମିଳନ’ ସମାରୋହ ଅନୁଷ୍ଠିତ ହୋଇଥିଲା । ଏଥିରେ ଓଡିଶା ପ୍ରଦେଶ ସ୍ଵାଧୀନତା ସଂଗ୍ରାମୀ ସମିତିର ସଭାପତି ,୧୦୪ବର୍ଷର ସଂଗ୍ରାମୀ ପୁରୁଷୋତ୍ତମ ନାୟକ,ରାଷ୍ଟ୍ରପତି ସମ୍ମାନ ପ୍ରାପ୍ତ ସଂଗ୍ରାମୀ ଭିକାରୀ ଚରଣ ମହାନ୍ତି ,ନୀଳମଣି ସାମଲ,ସରସ୍ଵତୀ ତ୍ରିପାଠୀ,ସଂଗ୍ରାମୀ ବଂଶିଧର ମଲ୍ଲିକ,ମକର ଦାସ,ବିମ୍ବାଧର ମୁଦୁଲି ପ୍ରମୁଖ ଯୋଗଦେଇଥିଲେ । ସ୍ୱାସ୍ଥ୍ୟ ଓ ପରିବାର କଲ୍ୟାଣ ତଥା ସୂଚନା ଓ ଲୋକସମ୍ପର୍କ ମନ୍ତ୍ରୀ ଶ୍ରୀ ଅତନୁସବ୍ୟସାଚୀ ନାୟକ ଅଗଷ୍ଟ କ୍ରାନ୍ତି ର ମିଳନ କାର୍ଯ୍ୟକ୍ରମକୁ ଉଦଘାଟନ କରି କହିଥିଲେ ଯେ,ଆଜିର ଯୁବପିଢି ସ୍ଵାଧୀନତା ସଂଗ୍ରାମୀ ମାନଙ୍କ ତ୍ୟାଗ ଏବଂ ଆଦର୍ଶକୁ ଜୀବନର ବ୍ରତ ଭାବେ ଗ୍ରହଣ କରିବାର ଅବଶ୍ୟକତା ରହିଛି । ମୁଖ୍ୟ ଅତିଥି ଭାବରେ ଯୋଗ ଦେଇ ପର୍ଯ୍ୟଟନ ଓ ସଂସ୍କୃତି ମନ୍ତ୍ରୀ ଶ୍ରୀ ଅଶୋକ ଚନ୍ଦ୍ର ପଣ୍ଡା କହିଲେ ଯେ ଅଗଷ୍ଟ କ୍ରାନ୍ତି ର ବାର୍ତ୍ତା ଭବିଷ୍ୟତର ଭାରତ ପାଇଁ ଅମୂଲ୍ୟ ସ୍ମୃତି । ଏହି ବାର୍ତ୍ତାକୁ ପ୍ରତ୍ୟେକ ଭାରତୀୟ ଙ୍କ ହୃଦୟରେ ଉଜ୍ଜୀବିତ କରାଯାଉ । ବରେଣ୍ୟ ଅତିଥି ଭାବରେ ଯୋଗଦେଇ ପଞ୍ଚାୟତରାଜ ଓ ଆଇନମନ୍ତ୍ରୀ ଡଃ ଅରୁଣ କୁମାର ସାହୁ ରାଜ୍ୟ ସ୍ଵାଧୀନତା ସଂଗ୍ରାମୀମାନଙ୍କର ବଳିଦାନକୁ କେହି ଭୁଲିଯିବା ଉଚିତ ନୁହେଁ ବୋଲି ମତ ଦେଇଥିଲେ । ଅନ୍ୟତମ ବରେଣ୍ୟ ଅତିଥି ବିଧାୟକ ଅମର ପ୍ରସାଦ ଶତପଥି ଅଗଷ୍ଟ କ୍ରାନ୍ତି ମହାନ ଦିବସରେ ସ୍ଵାଧୀନତା ସଂଗ୍ରାମୀ ମାନେ ଏକାଠି ହୋଇ ସ୍ମୃତି ରୋମନ୍ଥନ କରିବାର ଓ ଭବିଷ୍ୟ ପିଢୀ ପାଇଁ ଏକ ବାର୍ତ୍ତା ଦେବାର ଅବସର ଅବିସ୍ମରଣୀୟ ବୋଲି କହିଥିଲେ । ସମ୍ମାନିତ ଅତିଥି ଭାବରେ ବିଧାୟକ କ୍ୟାପଟେନ ଦିବ୍ୟଶଙ୍କର ମିଶ୍ର ,ଭୁବନେଶ୍ଵର ମେୟର ଅନନ୍ତ ନାରାୟଣ ଜେନା,ପୂର୍ବତନ ମେୟର ତଥା ସେଣ୍ଟ ଜୋନ୍ ଆମ୍ବୁଲାନ୍ସ ର ସମ୍ପାଦକ ଡାକ୍ତର ଜଗନ୍ନାଥ ମହାପାତ୍ର, ଡେପୁଟି ମେୟର କେ.ଶାନ୍ତି ପ୍ରମୁଖ ଯୋଗ ଦେଇଥିଲେ । ସଂଗ୍ରାମୀ ମାନଙ୍କୁ ଏହି ଅବସରରେ ଅତିଥି ମାନେ ସମ୍ବର୍ଦ୍ଧିତ କରିଥିଲେ । ବଡଚଣା ଗାନ୍ଧୀ ବୃନ୍ଦାବନ ତ୍ରିପାଠୀ ସ୍ମୃତି ସଂସଦ ଓ ସଂଗ୍ରାମୀ ଜଗନ୍ନାଥ ମାନ୍ଧାତା ସ୍ମୃତି ପରିଷଦ ସହଯୋଗରେ ଏହି କାର୍ଯ୍ୟକ୍ରମ କରାଯାଇଥିଲା ।

Share in top social networks!